Gramatiche furlane di riferiment

La “Gramatiche furlane di riferiment” e je il gnûf impuartant supuart pal studi e pe cognossince dal furlan, e e je ancje pont di riferiment pe planificazion linguistiche de lenghe furlane. Chest imprest metût adun partint di dâts linguistics e de competence di cui che al fevele furlan, al è a disposizion no dome di linguiscj e di ricercjadôrs universitaris, ma di dute la comunitât furlane e di cui che si interesse e che al lavore cu la lenghe furlane.

Il progjet al è stât realizât de Universitât Pedagogjiche de Carinzie cu la poie de ARLeF – Agjenzie regjonâl pe lenghe furlane par meti in vore il Plan gjenerâl di politiche linguistiche pe lenghe furlane 2021-2025 de Regjon Autonome Friûl-Vignesie Julie. Al è stât ideât e coordenât dal Prof. Franco Finco, de Universitât Pedagogjiche de Carinzie (PHK), dal Prof. Luca Melchior, de Universitât di Clanfurt (AAU), dal Prof. Paolo Roseano, de Universitât Nazionâl di Educazion a Distance di Madrid (UNED). A àn colaborât ancje docents e ricercjadôrs di 14 universitâts europeanis, cun competencis specifichis in ambit linguistic su la lenghe furlane o su la linguistiche retoromanze.

Altris autôrs che a àn colaborât ai cjapitui a son:
Dr. Tommaso Balsemin, Universität Frankfurt am Main, Gjermanie; Dr. Jan Casalicchio, Universitât di Siene; Dr. Giuseppe Magistro, Universiteit Gent, Belgjiche; Prof. Laura Vanelli, Universitât di Padue.

I revisôrs sientifics a son:
Dr. Giorgio Cadorini, Masarykova Univerzita, Brno, Republiche Ceche; Prof. Patrizia Cordin, Universitât di Trent; Dr. Simone De Cia, University of Manchester, Ream Unît; Prof. Sabine Heinemann, Universität Graz, Austrie; Prof. Angela Fabris, Alpen-Adria-Universität Klagenfurt e PHK, Clanfurt, Austrie; Prof. Diego Pescarini, Université Côte d’Azur, Nice, France; Dr. Davide Turello, Universität Bamberg, Gjermanie; Prof. Gabriele Zanello, Universitât dal Friûl, Udin.

A àn furnide la lôr consulence ancje il Prof. Alvise Andreose de Universitât dal Friûl e il Prof. Giampaolo Salvi de Universitât Eötvös Loránd di Budapest.

LA ATENZION PE LENGHE FEVELADE

I dâts presentâts a son il risultât dal confront fra i locutôrs cu la leterature sientifiche dedicade ai diferents aspiets gramaticâi de lenghe furlane. Cheste modalitât e à permetût une rapresentazion plui articolade e documentade dal furlan, cu la analisi di imprescj sientifics de linguistiche moderne. A son stâts studiâts e descrits soredut setôrs de gramatiche furlane fin cumò trascurâts, massime a nivel di sintassi.

UN PERCORS VIERT

Intant che une gramatiche normative e fisse a priori l’ûs di une lenghe, une gramatiche di riferiment e à tant che fonde la descrizion e la analisi sientifiche de lenghe vive e reâl, cun regulis gjavadis fûr dal so ûs efetîf. Cun di plui une altre sô carateristiche e je il percors che si pues insiorâ, revisionâ e disvilupâ cun altris contribûts e aprofondiments. La “Gramatiche furlane di riferiment” e je duncje un imprest viert al confront cu la comunitât di cui che al fevele furlan, par pussibilis integrazions, precisazions, mioraments.

CEMÛT SEGNALÂ UN CONTRIBÛT

Si invidin i feveladôrs natîfs di furlan (locutôrs di marilenghe furlane) a visionâ la “Gramatiche” – i cjapitui si puedin discjamâ culì sot – e a condividi osservazions, sugjeriments e contribûts mioratîfs o esemplis utii par insiorâ la descrizion de lenghe.

Ogni informadôr furlanofon al pues inviâ il so contribût dentri dai 31 di Dicembar dal 2026, mandant une e-mail a cheste direzion di pueste eletroniche: gramatichefurlane@sportelfurlan.eu.

I contribûts che a rivaran a vignaran valutâts pai fins de publicazion finâl.

---