Liniis vuide

PE PRODUZION DI MATERIÂI DIDATICS DI E PE LENGHE FURLANE E PE ATIVITÂT DAI CENTRIS DI DOCUMENTAZION

L’articul 16 de leç regjonâl dai 18 di Dicembar dal 2007, n. 29 al definìs che la produzion di materiâl didatic pal insegnament de e inte lenghe furlane e il davuelziment di ativitâts di documentazion, ricercje e sperimentazion didatiche pe lenghe furlane a vadin daûr di liniis vuide definidis di pueste e fatis buinis de ARLeF.

Lis “Liniis vuide pe produzion di materiâi didatics di e pe lenghe furlane” si dan tant che criteris par garantî la cualitât dai prodots didatics che a àn il fin di fâ di supuart par organizâ un percors di insegnament e aprendiment de e te lenghe furlane tes scuelis de infanzie, primariis e secondariis di prin grât, ma a puedin cjatâ aplicazion ancje tal secont cicli di istruzion e tai materiâi dedicâts al ûs in prospetive di un aprendiment permanent.

Lis “Liniis vuide pe ativitât dai centris di documentazion” des ativitâts e dai materiâi didatics in e di furlan a son un strument pe programazion e pal operât di chescj Centris, e ancje un mieç di confront pe valutazion des funzions e des iniziativis che a fasin.

__________________________________________

I documents a son stâts elaborâts de “Comission pe redazion des liniis vuide sui materiâi didatics e i centris di documentazion”, cun components: Luca Melchior (President), Rosalba Perini, Patrizia Pavatti, Deborah Crapiz, Paola Cencini e Maurizio Driol.

Iter di aprovazion:

• Propueste fate buine ai 5 di Setembar dal 2022 dal Comitât tecnic sientific de ARLeF.
• Propueste fate buine ai 6 di Setembar dal 2022 dal Consei di Aministrazion de ARLeF.

---