fbpx

Risorsis

Bandiere dal Friûl


La bandiere dal Friûl e je la bandiere de regjon storiche dal Friûl.

Daûr dal articul 6, come 1 bis, de leç regjonâl dai 27 di Novembar dal 2001, n. 27, de Regjon Autonome Friûl-Vignesie Julie, e je formade “di un drap di forme retangolâr cun al centri une acuile eraldiche di aur cu lis alis spleadis, cjâf a çampe, bec viert e sgrifis rossis, suntun cjamp celest. Lis dimensions de steme a àn di jessi trê cuints de altece de bandiere, e cheste e à di jessi alte doi tierçs de sô lungjece”.

La bandiere si espon in maniere uficiâl intai lûcs publics dai comuns che a fasin part de minorance linguistiche furlane, dongje de bandiere de Regjon Autonome Friûl-Vignesie Julie, di chê taliane e di chê de Union Europeane. Tal detai, e je esponude, sedi dai ents publics che dai privâts citadins, in ocasion de ricorence dai 3 di Avrîl, aniversari de istituzion dal Stât patriarcjâl di Aquilee, ricognossût de leç regjonâl dai 27 di Març dal 2015, n. 6, de Regjon Autonome Friûl-Vignesie Julie, tant che “Fieste de Patrie dal Friûl”. La bandiere dal Friûl e je la setime plui antighe in Europe (1334).

DIVIGNINCE

La divignince de bandiere e rimonte ae ete dal Stât patriarcjâl di Aquilee, clamât ancje Patrie dal Friûl o Stât patriarcjâl furlan, che dal 1077 al 1420 al à guviernât tant che stât sovran, vassal dal Sacri Roman Imperi, il Friûl e in moments alternis ancje altris teritoris (come la Istrie, il Cjadovri, la Carinzie, il Cragn e la Stirie).

L’esemplâr plui innomenât e antîc de bandiere patriarcjâl al è in mostre tal Domo di Udin. Un drap di forme cuadrangolâr (61 x 65,5 cm) di sede colôr grise celeste cuntune acuile tal centri che e à il cjâf che al cjale a man çampe. Il cuarp, lis gjambis e lis alis a son di colôr zâl e lis sgrifis di colôr ros. La bandiere e jere part dal furniment funerari dal patriarcje Beltram di Saint Geniès, restât su la catidre di Aquilee dal 1334 al 1350 e copât in maniere barbare di une conzure di nobii furlans.

Si à di meti in evidence che il simbul de acuile al caraterizave il Stât patriarcjâl furlan za prin dal patriarcje Beltram. Lu confermin i reperts numismatics che, cun sigurece, a incuadrin la adozion de acuile patriarcjâl tal principi dal 1200, cuant che al regnave il patriarcje Volgher (Patriarcje di Aquilee dal 1204 al 1218).

La bandiere dal Friûl no va confondude cun chê de istituzion aministrative “Regjon Autonome Friûl-Vignesie Julie”, stant che ancje chê e mostre une acuile, si ben che intune posizion diferente. La bandiere regjonâl e à une divignince tant plui resinte (1963) e dut un altri significât.

CARATERISTICHIS TECNICHIS DE BANDIERE UFICIÂL

La bandiere de comunitât furlane e je formade di un drap di forme retangolâr cun al centri une acuile eraldiche di aur cun alis spleadis, cjâf a çampe, bec viert e sgrifis rossis, metût in cjamp celest. 
La steme e à dimensions pâr a trê cuints de altece de bandiere che a sô volte e à di jessi alte doi tierçs de sô lungjece.
Dimensions ametudis in centimetris: 200×300, 150×225 e 100×150.

COLÔRS

Celest: Pantone 300 U – CMYK 90-51-0-0
Ros: Pantone 485 C – CMYK 0-100-100-0
Zâl: Pantone 108 U – YK 0-13-83-0
Neri: Pantone P Process Black U – CMYK 0-0-0-100

Consulte i materiâi

Ogjet Cjale
Aprofondiment su la bandiere dal Friûl
Cjale dutis lis fotos de iniziative "Lis vuestris bandieris" pe Fieste de Patrie dal Friûl

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304