fbpx

L’interès pe lenghe e pe leterature furlane a àn puartât, de seconde metât dal Votcent fin tai nestris dîs, a vê un numar impuartant di studis e di ricercjis, sedi pe elaborazion di repertoris lessicografics e di studis di linguistiche, e alore di vocabolaris e di gramatichis, sedi par meti dongje antologjiis e struments di critiche leterarie. In chestis pagjinis si cirarà di presentâ, plui tal detai, cierts dâts di fonde par chê che si podarès dî la ‘cuistion de lenghe furlane’, e chescj dâts a tocjin di une bande l’incuadrament e la valutazion storiche dal probleme, di chê altre la descrizion, avonde svelte, dai caratars tipics de lenghe furlane.

Il furlan al è la lenghe romaniche che e continue il latin de regjon di Aquilee. Si insede su lenghis di sostrât preroman (galic e venetic) e e ricêf i apuarts des lenghis des popolazions che cun lôr il Friûl al à condividût i moments de sô storie (lenghis gjermanichis, tant che il gotic, il langobart, il todesc, e i dialets slovens a orient de regjon).

O podìn fevelâ dal furlan tant che di un idiome neolatin cun carateristichis ben definidis a tacâ plui o mancul dal an 1000 d. di C. Lis testemoneancis documentariis dal furlan a son tantis, tacant dal secul XIV, par ûs pratics e aministratîfs, testemoneancis che a permetin di ricostruî cun precision la storie linguistiche dal Friûl. Il caratar linguistic fondamentâl dal furlan al è la fuarte individualitât arcaiche e tradizionâl, cu la conservazion di fenomens impuartants dal tart latin (il plurâl sigmatic pai sostantîfs, i nes consonantics cu la -l) e il disvilup di inovazions particolârs (lis vocâls lungjis, la palatalizazion des velârs devant di -a).

Consulte i materiâi

Ogjet Cjale
La aree linguistiche furlane
Il plurilinguisim in Friûl
Storie linguistiche dal furlan
I prins documents par furlan
La lenghe comune e lis varietâts
Caratars linguistics dal furlan
La "cuistion ladine"

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304