fbpx

Il cine furlan al nas vie pai prins agns Otante cun Maria Zef di Vittorio Cottafavi, film tirât fûr dal romanç omonim di Paola Drigo scrit intal 1936, che al conte une storie che Cottafavi di tancj agns al veve chê di puartâ sul schermi. Ambientât in Cjargne, Maria Zef al pant la tragjedie di une zovine che par difindisi e soredut par difindi sô sûr des sgrifis dal barbe, che cun chel a scuegnin dividi la vite tal mieç des monts, e finìs par copâlu. Pe realizazion di chest film, un rûl fondamentâl lu à vût il scritôr Siro Angeli che no dome al è l’autôr de senegjature, ma al interprete in mût magjistrâl la figure dal protagonist. Il film, dopo jessi stât trasmetût plui voltis de RAI regjonâl, al è stât presentât in putrops festivals e manifestazions internazionâls.

Zirât in 16 mm, e daspò sglonfât in 35 mm, il film no si cjate vuê in cundizions di jessi proietât. Di fat, lis copiis che a son restadis a àn dal dut smavît il colôr e ancje buine part dal sun al è lât ruvinât. Par no pierdi chest patrimoni de nestre cinematografie, un trop di realtâts culturâls – la Cineteche dal Friûl di Glemone, il C.E.C. (Centro Espressioni Cinematografiche) di Udin e Cinemazero di Pordenon – di agns incà a cirin di rivâ a di un restaur de copie e di cjapâ dentri intal progjet altris realtâts e naturalmentri la RAI che e à i dirits. Il progjet al previodarès ancje la distribuzion dal film in DVD acompagnât di un libri curât dal critic Sergio Grmek Germani.

Tai agns di Maria Zef si produsin ancje altris lavôrs sedi amatoriâi che professionâi, tant che I varès volût vivi di Pittini o lis versions furlanis, dal 1986, de trilogjie Cuintrileture part prime, seconde e tierce (une version insiorade cun gnûfs contribûts) di Marcello De Stefano, un dai regjiscj plui atents ae nestre realtât, che al torne a proponi, cul film/saç, la cuistion furlane sot ducj i ponts di viste.

Prime di chel moment, i pôcs films produsûts in Friûl a jerin ducj par talian. Tra chescj o ricuardìn La sentinella della patria di Chino Ermacora e soredut Gli ultimi di Vito Pandolfi e David Maria Turoldo. Un contribût decisîf pe vitalitât de nestre produzion al ven de Mostre dal Cine Furlan, festival bienâl che il Centri Espressions Cinematografichis di Udin al à creât tal 1988 par inviulâ e fâ cognossi il nestri cine. In gracie di cheste manifestazion, vie pai agns Novante a cressin la cualitât e la cuantitât dai prodots: dal luncmetraç a sogjet al documentari, dal film sperimentâl ae animazion.

La setime art e tire dentri simpri plui apassionâts e professioniscj. Tra chescj o podìn citâ figuris tant che Lauro Pittini, Lorenzo Bianchini e Massimo Garlatti-Costa par ce che al rivuarde la fiction; Benedetto Parisi, Giancarlo Zannier pes flabis e pes contis popolârs; Dorino Minigutti e Renato Calligaro pai films di caratar didatic e artistic; Remigio Romano, Carlo Della Vedova e une altre volte Parisi pai documentaris. In conclusion, o podìn dî che tal cjamp cinematografic in Friûl e je daûr a svilupâsi une alte professionalitât condizionade, magari cussì no, di masse limits di nature struturâl e organizative.

  • Si pues dî che il cine furlan al nas tal 1981 cun Maria Zef di Vittorio Cottafavi, un film gjavât fûr dal romanç omonim di Paola Drigo scrit tal 1936. Pe realizazion di cheste pelicule, e a vude une impuartance fondamentâl il scritôr Siro Angeli, che nol è stât dome l’autôr de senegjature, ma ancje l’atôr che al à interpretât in maniere magjistrâl la figure dal protagonist.

    Dut câs, tai agns di Maria Zef si produsin ancje altris lavôrs impuartants, tant che I varès volût vivi di Lauro Pittini, o lis versions furlanis di Cuintrileture (une version insiorade cun gnûfs contribûts) di Marcello De Stefano.

    De Stefano – autôr ancje di une senegjature là che i protagoniscj a fevelin par furlan, scrite tai agns 1954-55, cuant che al frecuentave ancjemò il Centro Sperimentale di Cinematografia di Rome – al capìs subite la impuartance de lenghe tant che element di fonde pe identitât di un popul e no dome tant che aspiet juste espressîf e esteriôr. Al è cussì che, tai agns che a van dal 1981 al 1984, al zire Grafiz tun orizont su la figure dal beât Luîs Scrosoppi, la prime opare a caratar religjôs dal nestri cine. Plui tart, tal 1986, al decît di realizâ la version furlane de trilogjie ControletturaUna linfa che scorreUomo, macchina, uomo, che e deventarà Cuintrileture part prime, seconde e tierce: la sô opare plui impuartante sul sens e sui valôrs di une etnie, su ce che di positîf cheste e pues dâ al mont di vuê. Chel di Marcello De Stefano al è un cine particolâr, un cine che si loghe a metât strade tra il documentari e il film a sogjet, in chel gjenar che lui al à definît “film-saç”. Une opare che e rapresente une ricercje estetiche di gnûfs lengaçs, che no si ferme, sul plan dai contignûts, ae documentazion pure de realtât ma che e cîr di trasmeti al public une vision origjinâl dal mont e di stimolâ la discussion e la riflession.

    Par promovi la produzion cinematografiche in marilenghe, il Centro Espressioni Cinematografiche – CEC di Udin, tal 1988 al pense di inmaneâ la Mostre dal Cine Furlan, un festival bienâl che al smire a stimolâ la creativitât, ma ancje a fâ cognossi al public dut ce che al ven produsût tal setôr cinematografic.

    Al è merit soredut di cheste manifestazion se, vie pai agns Novante, si assist a di une cressite costante de cualitât e de cuantitât dai prodots cinematografics: dal luncmetraç di finzion al documentari, dal film sperimentâl ae animazion. Al è in cheste ocasion che si formin e si fasin cognossi al public autôrs tant che Lauro Pittini, Lorenzo Bianchini, Massimo Garlatti-Costa, Benedetto Parisi, Giancarlo Zannier, Dorino Minigutti, Renato Calligaro, Remigio Romano, Carlo Della Vedova e inmò tancj altris.

    Se intune prime fase la produzion e veve un caratar pe plui part amatoriâl, cul passâ dal timp si assist a une professionalizazion progressive, tant che une part dai autôrs citâts a deventaran regjiscj a timp plen e produtôrs nomenâts. Ma al è cu la fin dai agns ’90 dal secul passât che cheste professionalizazion e da i prins risultâts. Tal 1999 Lorenzo Bianchini al realize il medimetraç I dincj de lune, prin esempli di horror in lenghe furlane (doi agns plui tart, Bianchini al proponarà ancjemò il stes gjenar, otignint un grant sucès, cun Lidrîs cuadrade di trê), intant Lauro Pittini al zire une biofiction sul scritôr Pieri Menis (Pieri Menis, ricuarts di frut).

    Simpri tal stes an, Carlo Della Vedova e Luca Peresson a realizin il prin documentari de serie Farcadice (par un totâl di cinc films: Colonia Caroya, Charleroi, Umkomaas, Toronto e Italia), dedicade ae storie de emigrazion furlane ator pal mont. Tal 2000 Massimo Garlatti-Costa a realize la comedie Buris, libars di scugnî vignî e tal 2004 il documentari Friûl, viaç te storie. A partî di chel moment, a saran soredut i documentaris a sparonâ.

    Dal 2004 si varà, di fat, un disvilup straordenari dal documentari, sedi classic che creatîf. Dongje dal za nomenât Friûl, viaç te storie di Massimo Garlatti-Costa, Dorino Minigutti, zuiant cu lis imagjins di archivi, al realize tal 2004 Nûfcent, videosclesis dal Friûl, un collage di dîs mini storiis, là che ognidune e rapresente un deceni dal secul a pene finît: croniche e events politics che a àn segnât, cualchi volte ancje in maniere tragjiche, la vite in Friûl. Minigutti al à racuelt e selezionât lis imagjins di archivi plui significativis e inusuâls par incalmâur dentri, midiant di un montaç particolâr, riflessions che a fasessin vignî fûr la storie de nestre tiere in maniere gnove, dant valôr sedi ai moments dificii sedi a chei comics, e evitant ogni forme di retoriche o di nostalgjie.

    Il film al sarà realizât in dôs parts: Nûfcent, videosclesis dal Friûl (part I) cui prins cinc episodis che a cuvierzin la prime part dal secul e, tal 2006, la seconde part. Dorino Minigutti, par chest so lavôr al vinçarà tal 2007 il premi Mario Quargnolo, assegnât de Mostre dal Cine Furlan.

    Tal 2005 Stiefin Morat e Giorgio Cantoni a metaran intun documentari che al à tant che protagonist il Tiliment e la int che e vîf su lis sôs spuindis, une dose fuarte di sperimentalisim. Titul dal film Mugulis, prin premi ae Mostre dal Cine Furlan dal 2005. Stefano Morandini, cuntun stîl dabon classic, al documente cu la sô videocjamare une des tradizions ancjemò une vore fuartis in Cjargne, ma che e jere presinte in dut il Friûl almancul fin ai agns ‘50, ven a stâi l’ûs des craçulis e dai batecui di len (al puest des cjampanis) tes zornadis de Passion. Titul: Crasulas a Enemonç, menzon speciâl e premi “Mario Quargnolo” in chel stes an.

    Une altre grande saghe documentaristiche e je rapresentade de schirie Farcadice di Carlo Della Vedova e Luca Peresson. Screade tal 1999 cun Farcadice – Diari di viaç, Colonia Caroya, Argjentine, chê che e deventarà un progjet seriâl cul obietîf di documentâ lis variis fasis de emigrazion furlane tal mont, e propon tal 2006 il secont volum de serie, Farcadice, diari di viaç: Charleroi, Belgjiche, relatîf a un dai episodis plui dramatics de nestre emigrazion, cuant che i furlans a lassarin la lôr tiere par lâ a lavorâ e, masse dispès, a pierdi la vite o a inmalâsi di silicosi, tes minieris de Belgjiche.

    Tal 2006 a vignirin fûr ancje altris documentaris di cualitât tant che Sul troi par Lucau di Lauro Pittini, che al met in imagjins une des tradizions plui significativis de Cjargne, ven a stâi chê di un pelegrinaç che, in bande dal valôr sacrâl, al à simpri vût il rûl di meti in relazion strente doi popui confinants: chel furlan e chel carinzian.

    Altris documentaris jessûts in chel an une vore siôr a son stâts: L’amôr une volte di Michele Federico, Storiis in cuatri lenghis di Erica Barbiani, Sergio Beltrame e Elena Vera Tomasin (premi Quargnolo 2007), Furlans di Romania di Gianni Fachin e La Fradaie dai Teracîrs e Mosaiciscj Furlans inte Americhe dal Nord di Irene Rubini. Cheste ultime vore, che e vierç une sfese su la storie incredibile e plurisecolâr, sul talent e su lis oparis dai mosaiciscj e dai teracîrs furlans tal mont, e cjatarà une continuazion doi agns plui tart cu La lungje strade dai teracîrs e mosaiciscj furlans in Europe dal stes regjist.

    Tal 2007 e sarà la volte di Farcadice, diari di viaç, Umkomaas, Sud Afriche, il tierç episodi di Farcadice cuntune scorsade te fortunade diaspore furlane tal Sud Afriche, opare completade pôc plui tart cul cuart episodi che nus puarte, cuntun salt spazitemporâl, te comunitât furlane di Toronto in Farcadice, diari di viaç, Toronto, Canada. Dorino Minigutti, invezit, al torne cuntun documentari sportîf, Il balon tal cjâf, une serie di vot intervistis a ancjetancj atletis e un Fernando Birri inspietât, protagonist innomenât dal cine mondiâl, che cul curt poetic e plurilengâl Elegia friulana al à volût ricuardâ la sô divignince.

    Infin, ma no ultin, Rumore bianco di Alberto Fasulo, imni al Tiliment, aes tieris che al lenç e ai oms e feminis che li a vivin. Fasulo, origjinari di San Vît dal Tiliment, al è un autôr (vuê ancje produtôr) cuntune cariere cinematografiche di gjavâsi il cjapiel. Prime di frontâ la regjie di Cos’è che cambia?, un documentari in omaç ae sô citadine di origjin, Fasulo al veve colaborât cun varis regjiscj tant che assistent, assistent operadôr, operadôr, fonic di prese direte. Tra lis tantis altris voris, al à colaborât ae produzion dal documentari par furlan Babel blu (che al à tant che teme la bandiere furlane), direzût di Renato Rinaldi.

    Di ricuardâ ancje il biel documentari di Fredo Valla e Nereo Zeper Cjavelârs e pelassíers sui racueidôrs di cjavei che des valadis ocitanis (il paîs di Elva al è famôs par chest) a traviersavin dute la plane padane rivant fin in Friûl. Fredo Valla, documentarist ocitan e autôr, fra l’altri, dal sogjet e de senegjature dal film E il vento fa il suo giro / E l’aura fai son vir diret di Giorgio Diritti (2007), al è di agns in rapuart strent cul Friûl, là che al à presentât i siei films in variis edizions de Mostre dal Cine Furlan, jessint stât un an ancje membri de jurie.

    Tal 2008 e ven produsude Autogrill, la prime sitcom in lenghe furlane: sîs pontadis realizadis di Claudia Brugnetta e metudis in onde de RAI (sede regjonâl pal Friûl – Vignesie Julie). A cheste i larà daûr, tal 2014, Bed&Breakfast, serie di siet pontadis ideadis e direzudis di Claudia Brugnetta cui tescj di Barbara Bregant e Federico Scridel.

    Il 2012 al è l’an dal film Visins di cjase, direzût dai glemonàs Marco Londero e Giulio Venier. Il film al è gjavât fûr di une senegjature di Renzo Brollo, segnalade al Concors par Tescj Cinematografics. In chest periodi, al tache ancje a cjapâ forme il progjet Felici ma Furlans di Alessandro Di Pauli e Tommaso Pecile, sitcom che e à vût un grant sucès di public, soredut su la rêt.

    Il leam tra cine e musiche si à rinfuarçât tai agns graciis ai documentaris musicâi plui resints realizâts di Marco D’Agostini. Si trate di JNK, oltri la ultime frontiere (2013) e dai diviers cjapitui di Suns Europe, realizâts tacant dal 2015, an de prime edizion dal festival european dedicât aes arts in lenghe minoritarie. In plui di testemoneâ ce che al sucêt vie pal event che ogni an ai prins di Dicembar al trasforme Udin e il Friûl tal centri de Europe multilengâl e creative, il documentari al regjistre lis testemoneancis dai artiscj partecipants. Un monument su ce che al significhe, in dì di vuê, doprâ la proprie lenghe mari in ambit artistic.

    O sierìn cheste panoramiche cun cualchi peraule su lis ultimis grandis produzions di docufilms. Si trate des voris di Massimo Garlatti – Costa Missus (2017) e Predis (2018) su la realtât ancjemò masse pôc cognossude di “Glesie Furlane” e sul rûl che e à vût te bataie autonomiste furlane.

  • E merete un discors a part la produzion che e smire a concuistâ spazis in television e su la rêt. Si trate di materiâi realizâts, tacant dal 2008, cuntune eterogjeneitât di stîi (si va de sitcom ai cartons animâts) e adats a diviersis categoriis di public. Tal specific si citin: dôs sitcom produsudis in mût diret de sede RAI regjonâl, Autogrill (2008) e Bed&Breakfast (2014) di Claudia Brugnetta; dôs voris di Massimo Garlatti-Costa Suns e Ator, dedicadis une ae sene culturâl furlane e chê altre a chê musicâl; la serie +Sklet di Giorgio Cantoni, realizade tra il 2005 e il 2015; la serie comiche Felici ma Furlans di Alessandro Di Pauli e Tommaso Pecile (prime stagjon 2010-2012 e 2014 la seconde) che e à regjistrât un grant sucès di public, soredut su la rêt; INT/ART, trê serie di documentaris dedicâts a zovins artiscj furlans che a doprin la marilenghe te lôr produzion artistiche (musiche, arts visivis, teatri, danze), progjet realizât di Dorino Minigutti e Giorgio Cantoni tra il 2016 e il 2018.

    A chestis produzions si zontin i documentaris realizâts di Marco D’Agostini e dedicâts a Suns Europe, il festival european des arts in lenghe minoritarie. Dal 2015 a cjapin sù lis testemoneancis dai artiscj che a partecipin a ogni edizion, e a son stâts trasmetûts des sedis RAI di Trent e di Triest dentri de programazion in lenghe ladine e furlane.

    La produzion plui resinte pal gjenar fiction e je Friûl Revolution (2015). E je une miniserie televisive in cinc pontadis di 20 minûts ognidune, ideade dal tercet comic I Cjastrons, cu la regjie di Marco D’Agostini. Lis ripresis a àn traviersât une trentine di localitâts furlanis, dal Crostis a Palme, di Udin a Dignan e, pe sô realizazion, par 40 dîs a son stâts “doprâts” passe 150 “atôrs” no protagoniscj.

    Par chel che al inten la infanzie, o citìn Âf blu (2015), il carton animât ideât, scrit, musicât, interpretât, dissegnât e animât fûr par fûr di professioniscj furlans. La pontade pilote e je stade realizade dal Centro Teatro Animazione e figure di Gurize, in colaborazion cu la ARLeF. Tal 2017, simpri cu la poie de ARLeF, al è tacât un progjet trienâl cul coinvolziment de societât di produzion Tucker Film. Infin, a son i cartons animâts in lenghe furlane, risultât de traduzion di materiâl produsût par talian o par inglês. A son: la Pimpa, version furlane dal famôs carton animât nassût dal lapis di Francesco Tullio Altan, voltade par furlan pe RAI regjonâl di Elio Bartolini; Berto Lôf, traduzion di Lupo Alberto di Silver, ideât di Elio Bartolini e di Giancarlo Deganutti pe sede regjonâl de RAI; Omenuts, version furlane dal carton “Little people” de Mattel-Fischer Price, realizade par cure di Massimo Garlatti-Costa cu la poie de ARLeF. Une vore resinte (2018) e je la realizazion de version par furlan dal carton animât Tui e Tuie cun protagoniscj doi simpatics gjatuts. Si trate di une produzion russe, là che la sô edizion in lenghe furlane e je stade curade di Belka Media e realizade de Raja Films, cu la poie de ARLeF.

  • Videoscais, un adun di episodis che a àn tant che protagoniscj i membris di une famee, al è il prin esperiment di videodidatiche pal furlan. Promovût de Catedre des lenghis modernis de Universitât dal Friûl tal 1991, direzût di Giancarlo Velliscig, il video al nas te suaze di un progjet di educazion bilengâl talian-furlan. Doi agns dopo, simpri in chel cuadri, Renato Calligaro al realize Lis striis di Gjermanie, un video tirât fûr de omonime conte di Catarine Percude, li che l’artist al misclice in mût creatîf i siei disens cun ripresis di atôrs, fantasie e realtât.

    Tal 1995 Dorino Minigutti al realize Bielscrivint, storie di une frute, Miute, che si piert intal “mont de scriture” e che par saltâ fûr e ven judade di une agane. Dorino Minigutti al è l’autôr di documentaris e films di finzion, soredut su problematichis di caratar sociâl (handicap, dipendence de droghe, Aids) e si è dedicât ancje ae scriture di senegjaturis. Tal 1999 al realize Intrics, storie fantastiche di strions, maçarots e fruts, ducj ator di une machine che e prodûs filastrocjis e proverbis intant che l’orcolat Mastiefumate al fâs di dut par fermâle. Simpri dentri di chest progjet tal 1997 Giuseppe Bevilacqua e Mara Udine a vevin realizât Linea dreta, linias dretas tirât fûr di une conte dal poete Leonardo Zanier che, in cheste “fantasia ator di una storiuta cjargnela”, al interprete se stes.

    Se o considerìn La sentinella della patria (1927) o podìn dî che il cine furlan al nas come documentari. E la produzion documentaristiche e varà di fat une part impuartante ancje dopo. Tal 1996 Marco Rossitti (docent di storie dal cine) al realizarà Il liutâr, une sorte di omaç poetic a cheste nobile profession vive ancje ca di nô. Dut câs, za tal 1988, Antonio Magliocchetti al veve realizât Jo o soi stade dome une volte al cine, un film-interviste che al vinçarà il secont premi ae Mostre. Carlo Della Vedova e Luca Peresson, tal 1999, a scrutinaran la realtât de comunitât furlane di Colonia Caroya (Argjentine) cun Farcadice (trasmetût ancje de television ladine) e intal stes an Benedetto Parisi – che, te sô produzion par talian al veve scandaiât la realtât Rom e la gnove imigrazion – al piture la umanitât di un personaç fûr dal ordenari, un artist di strade, Tony Zavatta, in Tony. Il stes autôr al realizarà, tal 2001, Gnovis dal Brasîl un video su la figure e lis sieltis di vite di un missionari furlan intune des zonis plui puaris dal Brasîl.

    Par completece o ricuardìn achì La fontana di Bosplans (1997) di Michele Marcolini e Vuere dome di ricuarts di Gianni Fachin (premiât ae VII edizion de Mostre).

    Un discors a part a mertaressin i lavôrs di Remigio Romano, che, traviers de imagjine filmade, al ricostruìs un mont aromai disparît. In Une zornade a seselâ (1993), al riprodûs il lavôr tai cjamps cemût che si davuelzeve ancjemò tai agns ’30 e ’40 e in Il purcit (1997) al ricuarde, cu lis peraulis di Mauro Corona, il sens e la impuartance che e veve cheste bestie par une famee contadine. Intal 1997 Massimo Garlatti-Costa al met adun Il piligrin, un lavôr a mieze strade jenfri sperimentazion, provocazion e divertiment. Agns prime, il regjist, che cumò al vîf e al lavore in Grande Bretagne, al veve realizât cul grup dai “Slapagnots” (Roberto Copetti, Massimiliano Lancerotto e Fabio Venuti) un film “demenziâl” intitulât Tele Frico (1993) e plui tart, dôs altri voris di ricercje: La sielte (1994) e Precarie Armonie (1995). Ma al sarà tal 2001 che Garlatti al metarà adun il so lavôr plui finît, un film che al varà ancje un straordenari sucès di public intune sale comerciâl: Buris, libars di scugnî vignî. Si trate di une comedie di 38’ che e piture un imagjinari paîs dal Friûl li che, par vignî fûr de crisi economiche, un disocupât al met impins une societât di produzion di films porno, che e deventarà in curt nuie mancul che une des industriis cinematografichis plui fuartis dal mont.

    Cun Buris si vierç une gnove ete pal cine furlan, pal fat che si prospete la idee di podê rapresentâ situazions e gjenars in grât di superâ une vision localiste. Ma, come che o viodarìn plui indenant, chest salt di cualitât nol è simpri e dal dut esent di ambiguitâts. In chest contest, tal 1999 Lorenzo Bianchini al zire I dincj de lune, prin horror par furlan. Il film, intun stîl che al deventarà la marche dal autôr, al met dongje aspiets e ambientazions carateristichis di chi cun elements costitutîfs dal horror classic. Tal 2001, Bianchini al realize Lidrîs cuadrade di trê, un luncmetraç che al viôt protagoniscj trê students di un istitût superiôr. I trê, dopo jessisi rindûts cont di vê falât un compit in classe decisîf, par no scugnî ripeti une altre volte l’an, a decidin di jentrâ di gnot te scuele par rimplaçâ i compits sbaliâts prime che il professôr ju corezi. Ma in chê gnot al sucêt alc che no vevin previodût e a scuvierzin robis che no varessin vût di vignî a savê. Il film, che al è stât proietât in variis ocasions, simpri cuntun grant sucès di public, al è ancje stât recensît di une riviste francese. Bianchini al à finît e mostrât al public, che al è pôc, un altri so film, intitulât Custodes bestiae, ma che al presente dome in piçule part dialics par furlan.

    Tal gnûf contest che o vin dit disore si à, dut câs, il sintiment che l’ûs de lenghe al resti dispès leât a une concezion strumentâl, vâl a dî che la lenghe e vegni doprade plui cu la preocupazion di “jessi fidêl a une realtât particolâr” che no come un codiç di comunicazion, cun dut ce che une sielte dal gjenar e puarte daûrsi. In altris peraulis si à la impression che l’autôr si meti denant di un “obiet” che “no i parten” ma che al “parten dome ae realtât che al piture”. Paradossalmentri, se di une bande si spanissin i contignûts, se si frontin i gjenars, se si scandain gnovis ambientazions, di chê altre si lasse la lenghe incjadenade a une dimension autoreferenziâl, condanade a restâ un sempliç furniment espressîf, impen di jessi il veicul comunicatîf.

    I agns che a van dal 1999 al 2001 a rapresentin un moment avonde ecezionâl pe nestre produzion cinematografiche, sedi sul plan cuantitatîf, sedi su chel cualitatîf. Di fat, a son di chei agns films che o vin za nomenât, tant che Pieri Menis, ricuarts di frut; Farcadice; Tony; Lidrîs cuadrade di trê; Gnovis dal Brasîl; Buris, libars di scugnî vignî. Ma ancje lavôrs come La muart cui çucui di Giorgio Milocco e Andrea Nardon (1999), un film di 22’ che al da fûr, zuiant suntun blanc e neri suturni, une straordenarie fuarce espressive. E je la storie di une prime zornade di vore di un zovin. Une fabriche isolade tal mieç di cjamps pustots, un ambient di lavôr malsan, un paron tiranic a fasin di suaze aes disaventuris che il zovin al scugne paidî, come intune sorte di vencul. Il film al è dutun fantastic e simbolic (la viele cui çucui che il fantat al intope, i scjaps di corvats, une fabriche che di fûr e samee un lûc bandonât) e intal stes timp realistic (il mont dal lavôr cui siei machinaris e cui siei ritmis infernâi).

    Intal 2001, il regjist Manlio Roseano al realize un film tirât fûr di un romanç di Sergio Cecotti, Il tierç lion: un poliziesc cun parentri elements di caratar metafisic, altri esempli di film di gjenar. Zirât in 16 mm, Il tierç lion al ven però realizât in lenghe taliane e dome dopo dopleât par furlan e distribuît in chê version in formât Betacam. La ultime edizion de Mostre (2003) e premiarà il luncmetraç di Remigio Romano Âstu mai pensât di sposâti…in Comun? une parodie dai “Promessi sposi” ambientade in dì di vuê (mandade ancje in onde su la RAI regjonâl); e segnalarà Cuatri cjantons par une “francje” di Carlo Damasco (cun Giuseppe Battiston; intune storie scrite di Giovanna Zorzenon premiade al Concors par Tescj cinematografics dal 2002); Lûs distudadis di Nicola Fraccalaglio e Thomas Marcuzzi e pe sezion dedicade ai fruts il film di Liviana Calabrò La roie di Cussignà.

    Par sierâ chest percors, no podìn fâ di mancul di ricuardâ il film di Christiane Rorato Vuerîrs de gnot, su lis olmis dai Benandants, presentât al d’Essai di Udin ae fin dal 2003. Il documentari, partint di un libri dal storic Carlo Ginzburg, al scandaie ce che vuê al è restât dai Benandants, i “strions bogns”, processâts tal 1500 de Incuisizion e, plui in gjenerâl, al puarte indenant une ricercje su lis tradizions che a son restadis ancjemò vivis tal Friûl di vuê.

  • Il 1988 al rapresente di sigûr un moment impuartant pal svilup dal nestri cine, un volt che al darà gnovis pussibilitâts ae produzion di chenti. Di fat in chel an, ideade e organizade dal CEC di Udin, e nas la Mostre dal Cine Furlan, un festival bienâl, competitîf, par films in lenghe furlane. Si trate di un spazi che al ven metût a disposizion ai cineascj che a puedin cussì fâ cognossi lis lôr voris e di un apontament che al vûl jessi (e che al sarà) un mût par stiçâ la nassite e il svilup di une gnove cinematografie. La prime edizion si presentave come un “esperiment” che al veve chê di scandaiâ la disponibilitât dai professioniscj e dai passionâts di cine a produsi films par furlan e di stazâ la rispueste dal public. La partecipazion e fo subit une sorprese che e lassave ben sperâ pal avignî e, lant indenant une edizion daûr di chê altre, si è podût assisti a une incressite cualitative des voris presentadis, dal interès de int e dai cinefii. La Mostre e deventarà cussì, a planc a planc, une farie di gnûfs autôrs tant che: Lauro Pittini, Benedetto Parisi, Giancarlo Zannier, Dorino Minigutti, Paolo Cantarutti, Massimo Garlatti-Costa, Remigio Romano, Carlo Della Vedova e tancj altris.

    Te seconde edizion dal festival (1991) al vinçarà un curtmetraç di Lauro Pittini intitulât I varès volût vivi. Il film, che al jere stât zirât in Super8 ancjemò intal 1981 e trasponût suntun supuart eletronic, al conte une storie vere, il drame di un emigrât che al torne tal so paîs dopo vê lavorât par agns in miniere. Aromai vieli e malât di silicosi, il protagonist si interoghe sul sens de vite e sul parcè di tant patî. La origjinalitât e la fuarce dal film a vegnin fûr de capacitât dal regjist di trasmeti la dramaticitât de storie e soredut pal fat che il personaç al interprete se stes e ce che al conte e je la vite che lui al à vivût pardabon. Al è di segnalâ ancje un altri film interessant, presentât in chê edizion: Cjossul di Michele De Mattio, un curtmetraç che, traviers di un straordenari blanc e neri, miscliçant finzion, documentari e ricercje formâl, al piture la storie di un personaç singolâr.

    Di fat, la sperimentazion e scomençarà une vore adore a imparêsi su la sene furlane. Simpri tal ’91, in fats, o podarìn viodi doi lavôrs di pure ricercje stilistiche e formâl, tant che Rivoluzion planetarie di Paolo Cantarutti e L’omp di Daniela Toneatto.
    Tal 1993 Lauro Pittini al jes cul luncmetraç Prime di sere, un film tirât fûr dal romanç omonim di Carlo Sgorlon. Zirât in Betacam, cence nissun jutori finanziari particolâr, Prime di sere al rapresente la sintesi di dut il cine di Pittini: un cine che al va in dentri tai personaçs scrusignant lis lôr psicologjiis, un cine che si interoghe sui dramis umans e sul sens de vite. Il film al conte la storie di Liseo, un om condanât par omicidi che al oten la liberât par buine condote dopo agns di preson. Segnât moralmentri e socialmentri, Liseo al cirarà in ducj i mûts di tornâ a inserîsi te societât. Ma al varà di frontâ i prejudizis de int, lis dificoltâts di cjatâ un lavôr, la malfidance e, cualchi volte ancje la tristerie dai oms. Bandonât dai siei parincj, Liseo al larà a stâ intune stanzie che une vedue, restade sole cun so fi, i afitarà. Par lui cheste femine e so fi a rapresentin ce che nol à mai vût: une famee e la comprension. Al contrari dal romanç, la conclusion dal film e reste vierte, lassant in sfrese la puarte su la sperance. Nassût a Schaffhausen in Svuizare tal 1961, Lauro Pittini al scomence a 15 agns a zirâ films in Super8. Tal 1984 al colabore pes ripresis e pe senegjature ae realizazion dal film Pinsîrs par dôs Istâts di Rino Gubiani (vincidôr ae prime edizion de Mostre). In plui dai films che o vin citât, tal 1983 al realize Colôrs di vite, tal 1996 al firme la coregjie di L’ereditât e tal 1999 al zire Pieri Menis, ricuarts di frut (segnalât ae VI edizion de Mostre e viodût di centenârs di arlêfs tes scuelis). I siei lavôrs a son stâts presentâts e a àn vût ricognossiments ancje in altris paîs de Europe. Cun di plui, al à colaborât cu la RAI e al à scrit dôs voris premiadis al Concors par senegjaturis.

    Intal 1994 Benedetto Parisi al realize Dopli funerâl, conte popolâr, li che si intopin i dissens di Laura Feruglio e la vôs di une viele di Preon, regjistrade de antropoliche Enza Sina. Parisi al veve scomençât a trasponi in film liendis e flabis fintremai dal 1988, cuant che al presentarà sui schermis dal festival di Udin Cui isal content in chist mont?, un lavôr realizât cu la tecniche videografiche. Il curtmetraç al vinçarà in chel an il prin premi. Tal 1991 al metarà in sene doi films: Une gnot in paradîs in colaborazion cun Gianfranco Casula, simpri cu la stesse tecniche, No è cussiença in chist mont, cun atôrs e mascaris origjinâls e, tal 1992, La grape d’aur li che al dopre lis sagumis rielaboradis dai atôrs. Il so viaç intal mont des flabis e des tradizions al va indenant tai agns seguitîfs cu la realizazion di La rusignole di Cretelungje (1995) (flabe ladine voltade par furlan) e cu la colaborazion te metude adun di trê films di animazion – Cua, cua cua tachiti là; Il frut tal sac e Il princip bambin – realizâts, tal 2001, dai students dal IPSIA di Glemone. Ma un altri setôr che al stice l’interès di Parisi, al è il documentari. L’autôr al à ancje firmât il film plui curt de storie dal cine: Integrazion (1997) che al dure dome un minût.

    Giancarlo Zannier intal 1995 al realize Benandants un dai pôcs luncmetraçs dal nestri cine. Par chest film su la figure dai strions bogns che a combatevin in sium lis fuarcis dal mâl, Giancarlo Zannier al dopre diviers stîi e nivei di leture: chel realistic par meti in sene i procès incuisitoris daûr dai documents storics e chel fantastic par rapresentâ i “viaçs” in spirt che a fasevin i Benandants tes batais cuintri dai strions dal mâl. Giancarlo Zannier al veve scomençât tal 1988 curant la regjie di Il copari de muart, une conte interpretade di Renata Chiappino, la protagoniste di Maria Zef. Chei altris siei films a saran Il timp dal venc (segnalât ae Mostre dal 1991) e Meni Fari, 40e…buine!!!, une rileture in clâf moderne di Meni Fari, zirade intal 2001.

  • Il “Concors par Tescj Cinematografics in Lenghe Furlane” al è nassût intal 1996, al scomençament dome par senegjaturis, ma che, a tacâ dal 2002, si slargje inmaneant cuatri sezions competitivis: une pes senegjaturis, une pes storiis par film, une pai saçs e une cuarte sezion pai articui di critiche. Organizât dal CEC – Centro Espressioni Cinematografiche, il Concors si davuelç ogni doi agns, in maniere alternade cu la “Mostre dal Cine Furlan” (vuê “Mostre dal Cine”) e al previôt par ogni sezion un prin premi monetari e des menzons pes oparis plui significativis. Cun di plui i lavôrs premiâts a vegnin publicâts inte riviste di cine par furlan “Segnâi di lûs”.

    Fin a vuê, a àn partecipât ae jurie de manifestazion personalitâts tant che Elio Bartolini, Luca Vendruscolo, Giorgio Placereani, Giancarlo Deganutti, Xavier Lamuela, Dante Spinotti, Renato Calligaro, Roberto Iacovissi, Alessandra Kersevan, Marcello De Stefano, Giovanni Frau, Mariella Micelli, Daniele Fior, Maurizio Mattiuzza, Max Mauro, Giorgio Cantoni, Stefano Moratto, Gianni Pascoli, Paolo Cantarutti, Massimo Garlatti-Costa, Mario Turello, Donato Toffoli. In dut a son stadis presentadis al “Concors” 48 senegjaturis, 14 storiis par film, 1 critiche e 7 saçs. In ocasion de iniziative il CEC al publiche e al presente un libri par furlan (o plurilengâl) su un teme cinematografic leât in mût diret o indiret al Friûl. I doi libris publicâts fin cumò in cheste suaze a son stâts: Cine e identitâts culturâls, la opare cinematografiche di Marcello De Stefano di Lara Meroi (ed. Centro Espressioni Cinematografiche, Udin, 2007); Il cine furlan in lenghe furlane di Sara De Simon (in trê lenghis: furlan, talian, inglês) (ed. Centro Espressioni Cinematografiche, Udin, 2010).

    Curiositâts

    OPARIS PREMIADIS E SEGNALADIS

    SENEGJATURIS

    Ricuart di Otubar di Lauro Pittini, 1996
    Vincidôr al Concors 1996

    L’aiarin di Avrîl di Giorgio Cantoni, 1996
    Menzon speciâl Concors 1996

    Parcè mi âstu fermât mame… di Massimo Garlatti-Costa e Fabio Venuti
    Menzon speciâl Concors 1996

    Gnot a Patoc di Lauro Pittini, 1998
    Vincidôr Concors 1998

    Il svindic da timp di Franca Mainardis e Nazareno Petris, 1998
    Menzon speciâl Concors 1998

    Se finirà la gnot di Gianni Gregoricchio, 1998
    Menzon speciâl Concors 1998

    Viatores di Francesco Tami (Checo Tam), 2000
    Vincidôr Concors 2000

    La cjase des ortensiis di Gianni Gregoricchio, 2000
    Menzon speciâl Concors 2000

    Il cuintribandîr di Luigi Ercole e Caterina Baldissera, 2002
    Vincidôr Concors 2002

    Tierce fûr – un cine par strade di Fabrizio Zamero
    Vincidôr Concors 2004

    La ultime pavee di Luigi Ercole e Caterina Baldissera, 2006
    Vincidôr dal Concors 2006

    Dut intune gnot di Stefano Gasti (scrit Stefano Gasti e Raffaele Serafini) Prin premi Concors 2008

    Visins di cjase di Renzo Brollo
    Mezon speciâl Concors 2008

    Il cjapitani e il tamon di Andrea (Andro) Peressutti e Riccardo Sabbadini, 2010
    Prin premi 2010

     

    STORIIS PAR FILM

    Cuatri cjantons par une “francje” di Giovanna Zorzenon, 2002
    Vincidôr Concors 2002

    No sta a pierdi il cjâf di Alberto Di Giusto, 2004
    Vincidôr Concors 2004

    Arbui vistûts di Raffaele Serafini, 2010
    Menzon speciâl 2010

     

    SAÇS SUL CINE

    Il critic cinematografic furlan Mario Quargnolo di Roberto Iacovissi, 2006
    Vincidôr dal Concors 2006

    Maria Zef. Un film sul e pal Friûl che nol plasê ai furlans di Paola Iasci
    Prin premi ex aequo Concors 2008

    Il cine di P.P. Pasolini: la lenghe scrite de realtât di Roberto Iacovissi
    Prin premi ex aequo Concors 2008

    Une ridade par simpri di Francesco Della Mea, 2010
    Prin premi 2010


Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304