Lenghe e culture

Leterature


I prins documents leteraris par furlan a son de metât dal Tresinte e dal prin Cuatricent. Si pandin dai efiets di cjartis pratichis, in concomitance cul implei dal furlan tant che lenghe di cancelarie, ma no si puedin calcolâ tant che l’inviâsi di une tradizion leterarie.

Se il Cuatricent al tâs, cul secul daspò si è devant di un sflorî di tescj, e ae nassite di societâts leterariis in embrion. Si distinguin i prins autôrs (Morlupin, Sini, Strassolt), leâts a filons diviers o cun personalitât moltepliç (Blancon, Donato). Il Sîscent al è dominât de Briade udinese e de ispirazion ferbinte di Ermes di Colorêt, intant che tal Sîscent al scrîf ancje Eusebi Stele, autonom par varietât di lenghe e par contignûts.

Tra Sîs e Sietcent, dongje di chei che a àn continuât su lis olmis dal Colorêt, si disglagne la produzion dal Friûl periferic, e Gurize cun Zuan Marie Marussig, Zuan Josef Busiç, Marzi di Strassolt.

Tal Votcent e à grande influence la figure di Pieri Çorut, calcolât a dilunc tant che il poete furlan par ecelence, che la sô produzion e salte fûr di une vene facile che e sielç il furlan centrâl tant che strument par rivâ a un public slargjât.

A van indenant in chest secul i studis sul furlan, sul so patrimoni lessicâl e documentari, intant che si esprim la prime vôs feminine significative, Catarine Percude.

Dal finâl dal Votcent no si pues plui limitâsi a une carelade svelte. Si moltiplichin di fat lis vôs, ma plui di dut si va incuintri a di un rinzovenîsi de tradizion leterarie, che e pee la scriture in furlan ai apuarts modernis. Partidant dal furlan tant che strument ‘intat’ in colocui cu lis leteraturis europeanis, al è Pier Paolo Pasolini, tal secont dopovuere, a definî il tai cun Çorut o cul “çorutisim”, intant che e je za vierte la strade a espressions malcuietis e plenis.

Consulte i materiâi

Ogjet Cjale
Lis origjins
Il Cinccent
Il Sîscent baroc e il Sietcent
il Votcent
Tra i doi secui
Il Nûfcent
Dopo Pasolini...
... e plui inlà ancjemò

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304