Te sezion “Materiâi” di chest sît e je a disposizion “Furlan Contât”, la publicazion che e da dongje i risultâts de ricercje sociolinguistiche “Tire fûr la lenghe”, realizade par capî e analizâ l’ûs de lenghe furlane e di chês altris lenghis feveladis in Friûl.
La indagjin e je stade fate tal 2023 di IRES FVG in colaborazion cul FEF (Forskningscentrum för Europeisk Flerspråkighet) e un comitât sientific costituît di linguiscj des universitâts di Bolzan, Milan, Pavie, Trent e Vigo (Galizie). Il volum, che al è stât editât par cure de IRES FVG in colaborazion cu la Agjenzie, al met a disposizion de comunitât sientifiche, des istituzions e dai citadins un cuadri analitic detaiât dai risultâts de ricercje.
La indagjin, sostignude de Regjon F-VJ, e je stade realizade cul contribût de ARLeF inte suaze dal Plan gjenerâl di politiche linguistiche pe lenghe furlane 2021-2025.
Il studi si è fondât su passe 4.300 intervistis cjapadis sù in 178 Comuns dal Friûl-VJ e dal Venit orientâl midiant di un cuistionari di uns cent domandis, par plui a rispueste sierade. Ancje il contribût di 74 istitûts comprensîfs al è stât fondamentâl: graciis al supuart dai insegnants, di fat, a àn permetût che la indagjin e rivàs intes fameis e che la rapresentazion de popolazion par etât e gjenar e fos largje e trasversâl.
Intal volum a vegnin presentâts la metodologjie doprade dai ricercjadôrs e i risultâts de grande cuantitât di dâts analizâts, cul supuart di taulis cartografichis e tabelis, dividudis daûr dai cjapitui: Famee, Comunitât, Competencis, Media, Ideologjie e Identitât. Cun di plui, la publicazion e ufrìs un confront cu lis ricercjis sociolinguistichis passadis, une analisi SWOT sul stât de lenghe furlane e une serie di riflessions e di propuestis pes politichis linguistichis futuris.
La edizion di cjarte de publicazion “Furlan Contât” e vignarà donade in curt aes bibliotechis dal Friûl e ai esperts dal setôr.
Un graciis di cûr pal grant lavôr ai curadôrs de opare Vittorio Dell’Aquila, Stefano Fiori, Michele Flaibani, Johannes Mücke e Fernando Ramallo e ai membris dal Comitât sientific Patrizia Cordin, Silvia Dal Negro, Ilaria Fiorentini, Sanita Lazdiṇa, Heiko Marten. Gracionis ancje a lis scuelis, ai docents, ai colaboradôrs di IRES FVG e ARLeF pe organizazion de ricercje e a dutis lis personis che a àn parctecipât al scandai.
I dâts principâi de ricercje in struc
Plui di 444 mil locutôrs atîfs
La ricercje e conferme la vitalitât de lenghe furlane: lis personis che le fevelin in maniere ative a son cirche 444.000, plui de metât de popolazion dai teritoris indagâts. Il numar al rive a cirche 700.000 tignint cont ancje di cui che le capìs.
Une lenghe ancjemò presinte intes fameis
Il furlan al continue a vê un rûl impuartant te trasmission familiâr: il 51% dai intervistâts lu declare tant che lenghe fevelade dai gjenitôrs, il 44%, invezit, lu dopre cu la mari e cul pari.
Plurilinguisim percepît tant che valôr
Il 79% dai intervistâts al calcole che cressi intun contest plurilengâl al rapresenti un vantaç e no che al impedissi l’aprendiment scolastic.
La domande di furlan a scuele e cres
Cuasi il 70% dal campion al declare di jessi a pro di une presince plui significative dal furlan tes scuelis; ancje tal Venit orientâl (59%) chest valôr al reste alt.
Fuarte identitât culturâl
Il sens di apartignince furlane al ven fûr a fuart: il 52% dai intervistâts si sint “une vore” furlan, percentuâl che e rive al 75% cjapant dentri ancje cui che si definìs “avonde” furlan.
Plui supuart aes politichis linguistichis
Il 77% dal campion al è a favôr dal doprâ risorsis publichis par sostignî la lenghe furlane. Il valôr adeguât pai intervistâts al corispuint a 22 euros parom par an.
Furlan simpri plui presint tal digjitâl
La lenghe e je presinte soredut inte comunicazion online e intes aplicazions di messazistiche: une persone su cuatri e dopre il furlan intai messaçs vocâi.
Al cres il ricognossiment dal furlan inte aministrazion publiche
Ancje se il furlan intai uficis publics al ven doprât inmò in maniere limitade, il 42% dai intervistâts al volarès viodi la lenghe plui presinte ancje intai rapuarts cu la aministrazion publiche: al è un segnâl che la legjitimazion dal furlan in contescj istituzionâi e formâi e je daûr a cressi.
Consulte i materiâi
| Ogjet | Cjale |
| Volum "Furlan Contât" |
|
