Ogni martars aes 14.20 e aes 21.30, cuntune repliche di vinars, a van in onde i programs produsûts de sede RAI regjonâl
Tignît di voli il canâl 810 dal digjitâl terestri (Rai 3 bis): al è culì, di fat, che i furlans a puedin sintonizâsi par viodi la gnove programazion televisive par furlan inmaneade de RAI regjonâl. L’acuardi tra la Presidence dal Consei e la RAI, in vore dal 1n di Otubar dal 2020 fin ai 21 di Avrîl dal 2021, al à zontât pe prime volte 30 oris intun an di trasmissions televisivis par furlan, adun cuntun potenziament de produzion radiofoniche, che e passe di 90 a 120 oris.
Rai 3 bis (canâl 810) al trasmet ogni martars programs in lenghe furlane par grancj e par piçui, in dôs fassis orariis di pueste.
Des 14.20, dopo dal TGJ regjonâl, une selezion di cartons animâts par furlan e puartarà ligrie e divertiment intai dopodimisdîs dai plui piçui.
Inte fasse serâl invezit, des 21.30, la ufierte culturâl e je pardabon varie. A laran in onde spetacui teatrâi, films, videos e sitcoms par furlan. Tra chescj, colaborazions di presi che a rindaran la lenghe furlane une protagoniste gnove e impuartante pal palinsest de Rai.
Dutis lis trasmissions a laran in repliche ogni vinars: chês pai fruts aes aes 14.20 e chês dal palinsest serâl aes 21.20.
Ve culì i programs inzornâts:
martars ai 12/04 – Prin Plan, par cure di EditEventi; po dopo Feminis – prime part, di Minigutti e Floramo
martars ai 19/04 – Dleng 7, conciert; po dopo Feminis – seconde part di Minigutti e Floramo
martars ai 26/04 – Pozzis Samarcanda – prime part, di Stefano Giacomuzzi
martars ai 03/05 – Pozzis Samarcanda – seconde part, di Stefano Giacomuzzi
martars ai 10/05 – Prin Plan, par cure di EditEventi; po dopo Feminis – tierce part, di Minigutti e Floramo
martars ai 17/05 – Dleng 8, conciert; po dopo SNAIT. Ricercje e istruzion in Academie/1 di Marco D’Agostini
martars ai 24/05 – Sul palc di La Cjase. Lagrimis di aiar e soreli – speciâl di A. Zani sul spetacul dal Teatri Stabil Furlan
