Te ocasion de conference stampe fate tal palaç de Regjon di Udin, dulà che si à celebrâts i trente agns de leç regjonâl 15/1996, si à ricuardât i moments fondamentâi dal percors inviât e i progjets che cheste leç è à permetût di puartâ indenant, al è stât presentât, in anteprime assolude, ancje un gnûf e impuartant imprest di documentazion e analisi sientifiche de lenghe furlane: la “Gramatiche furlane di riferiment“.
Al è un gnûf e impuartant sussidi par studiâ e cognossi il furlan. Un pont di riferiment pe planificazion linguistiche de lenghe furlane. La “Gramatiche furlane di riferiment” e met a disposizion no dome dai linguiscj e dai ricercjadôrs academics, ma di dute la comunitât furlane e di chei che si ocupin e che a lavorin cu la lenghe furlane, un imprest costruît a partî dai dâts linguistics e de competence dai siei locutôrs. Il progjet al è stât ideât e coordenât dal Prof. Franco Finco, de Universitât Pedagogjiche de Carinzie (PHK), dal Prof. Luca Melchior, de Universitât di Clanfurt (AAU), dal Prof. Paolo Roseano, de Universitât Nazionâl di Educazion a Distance di Madrid (UNED) e à viodude la colaborazion di impuartants studiôs dal furlan o di aspiets particolârs de lenghe (docents e ricercjadôrs di 14 universitâts europeanis).
Si trate di un progjet inovatîf, ispirât aes miôr esperiencis sientifichis di chês altris lenghis e che si presente tant che un percors viert. Salacor e je la prime gramatiche che e met adun in maniere organiche i studis fats fin cumò sul furlan, ufrint un cuadri de lenghe che al è, di un pont di viste sientific, al pas cui timps, e di un pont di viste de completece, unic tal so gjenar pal furlan. Par cheste lenghe a esistin cetancj studis, ma in gjenar a son disponibii su publicazions diferentis. Pe prime volte, invezit, o vin un unic imprest gramaticâl, complet, che al rapresente un pont di riferiment pe creazion di materiâi didatics, sedi pes scuelis che pal insegnament ai adults.
Ducj i locutôrs di marilenghe furlane a son invidâts a visionâ i cjapitui de gramatiche – a disposizion sul sît www.arlef.it, te sezion Consulte i materiâi – e a condividi osservazions, sugjeriments e contribûts par miorâ, segnalant eventuâi aspiets di esaminâ o esemplis utii par insiorâ la descrizion de lenghe.
Ogni informadôr furlanofon al pues inviâ il so contribût dentri dal 31 di Dicembar dal 2026 a cheste direzion di pueste eletroniche: gramatichefurlane@sportelfurlan.eu.
I contribûts ricevûts a saran valutâts pe publicazion finâl.
🔗 Va te pagjine di progjet par scuvierzi ducj i detais de campagne.
