Costituzion de Republiche Taliane

Te ocasion dal 75^m inovâl de jentrade in vore de Costituzion de Republiche Taliane, la ARLeF e la Regjon Autonome Friûl-Vignesie Julie a àn realizade la publicazion de “Costituzion de Republiche Taliane”. E je la version bilengâl, talian-furlan, de Cjarte fondamentâl che dal 2023 e ven regalade a ducj i residents tai Comuns di lenghe furlane che a àn a pene finît disevot agns.

Il volum al à un grant valôr simbolic pe sô funzion divulgative e, soredut, parcè che cussì si da atuazion ai dirits linguistics dai citadins.

L’art. 6 de Costituzion Taliane al stabilìs che “La Republiche e tutele cun normis di pueste lis minorancis linguistichis”. La lenghe furlane, adun cu la impuartance di promovile e valorizâle, e ven duncje ricognossude. Cun di plui, si garantìs il dirit di podêle doprâ in ducj i contescj de vite sociâl, par che e restedi vive e orientade bande l’avignî.

La “Costituzion de Republiche Taliane” e je dade fûr a titul gratuit ai Ents locâi delimitâts tal ambit furlanofon, par che le dedin in regâl ai residents che a àn a pene finît disevot agns.

OGNI COMUN AL PUES DOMANDÂ LIS COPIIS PAI SIEI RESIDENTS CHE A ÀN A PENE FINÎT 18 AGNS

Ogni an i Ents Locâi a puedin domandâ il volum jemplant il modul online, disponibil al link ca sot:

Dopo vê inoltrât il modul e dopo de aprovazion dai materiâi di comunicazion preparâts pe cerimonie di consegne de “Costituzion de Republiche Taliane”, al Comun i rivarà de Segretarie de ARLeF la comunicazion di concession dal Patrocini.

INDICAZIONS PAI MATERIÂI DI COMUNICAZION

Ducj i materiâi di comunicazion (letaris di invît, invîts, locandinis, tescj pai sîts web, comunicâts stampe e v.i.) che i Ents locâi a predisponin par promovi la iniziative di consegne de “Costituzion de Republiche Taliane” a varan di:

• jessi scrits par talian e par furlan, tal rispiet de grafie uficiâl de lenghe furlane e garantî la evidence grafiche compagne par dutis dôs lis lenghis;
• rispietâ lis “Liniis vuide pe produzion dai materiâi di comunicazion”, disponibilis te aree download di cheste pagjine;
• meti il logo de ARLeF daûr des modalitâts e des indicazions specificadis tes Liniis Vuide;
• jessi mandâts prime par aprovazion.

Si pues domandâ al Sportel regjonâl pe lenghe furlane il servizi di traduzion (sore nuie) dai materiâi di comunicazion, mandant une e-mail a: ents@sportelfurlan.eu

• Cemût fâ par domandâ la aprovazion dai materiâi

  I materiâi di comunicazion si varan di mandâ in revision e aprovazion, almancul 30 dîs prin de iniziative in program, ae direzion ents@sportelfurlan.eu e in cc ae Segretarie ARLeF, ae direzion arlef@regione.fvg.it

  Par facilitâ la predisposizion dai materiâi, te sezion download di cheste pagjine a son a disposizion:

  • facsimil di letare di invît
  • facsimil di locandine
  • imagjin de cuviertine e mockup dal volum, se si vûl doprâle tal impagjinât grafic.

INDICAZIONS PAR RITIRÂ I VOLUMS

Lis copiis de “Costituzion de Republiche Taliane” si consegnin dome su apontament.

• Cemût fâ par cjapâ apontament

  La date e l’orari par ritirâ lis copiis des Costituzions si varan di concuardâ cul siôr Eugenio Busolini, scrivint almancul 15 dîs prin de date proponude ae direzion: eugenio.busolini@regione.fvg.it e in cc ae Segretarie de ARLeF, ae e-mail arlef@regione.fvg.it.

  I volums si puedin ritirâ dome tes zornadis di martars e joibe, des 8:00 aes 12:00, li dal magazen de ARLeF (vie Carducci 44, Udin).

---