Maraveis in sfrese – Mittelfest 2019

Musiche, leterature e piture dai plui grancj autôrs furlans dal secul XVI a vuê, a àn componût lis pagjinis intensis dal spetacul “Maraveis in sfrese” che ai 21 di Lui dal 2019 al à sierât Mittelfest 2019, inte curnîs splendide e plene di int di Place dal Domo a Cividât. Un event di profîl artistic une vore alt e plen di sugjestions, che al à metût in sene musiche, cjant, videoart, recitazion e danze intun ecuilibri savint di lengaçs e di autôrs diviers.

Promovût de ARLeF – Agjenzie Regjonâl pe Lenghe Furlane, sot de direzion artistiche di Marco Maria Tosolini, il conciert “visuâl” al à vût tant che interpretis la preseade Orchestra giovanile Filarmonici Friulani, unic esempli in regjon di ensamble gjestît e coordenât di zovins sot dai 30 agns, vuidât in maniere autorevule e eficace dal diretôr Walter Themel. Insiemi ae corâl Nuovo AuriCorale VivaVoce, direzude di Monica Cesar, a àn dât une otime prove di cemût che si son savûts movi cun sigurece fra autôrs e musichis di epochis diviersis, caraterizadis tant di solenitât che di origjinalitât e di frescjece compositive. Il viaç inte storie musicâl dal teritori al à cjapât dentri il public intun percors che si è viert cul Imni dal Friûl di Valter Sivilotti, e che si è a man a man disvilupât su lis notis di Jacopo Tomadini, Alfredo Scannact (pseudonim di Francesco D’Altan) riviodût di Daniele Zanettovich, Adriano Galliussi, AlbinoPerosa, passant dopo ae contemporaneitât cul stes Zanettovich, AlessioVenier, Federico Gon e Renato Miani, cuntune prime assolude, par sierâ cu lis composizions di Cecilia Seghizzi, Gianfranco Plenizio e, infin, cul compositôr cec Antonín Dvořák (cuntune Danze slave in regâl al Friûl, puarte di orient).