La associazion Teatri Stabil Furlan e scree la sô ativitât vinars ai 6 e sabide ai 7 di Dicembar al Teatri Sant Zorç a Udin cun Licôf, dôs zornadis di incuintris, di metudis in sene e di iniziativis cun dramaturcs, atôrs e regjiscj, par valorizâ il teatri professionâl in lenghe furlane.
Fâ licôf par furlan al vûl dî screâ cuntune bevude la cjase a pene finide di fâ sù. Cun chest spirt la associazion TSF metude adun di pôc in gracie de idee e de intenzion di Nico Pepe tal 1979 e puartade indenant cun impegn di Bepi Agostinis, e à volût cjapâ dentri regjiscj, atôrs e dramaturcs furlans par dâ vite a doi dîs di spetacui.
Il coordenadôr artistic, Massimo Somaglino al à individuât sîs ambits, di mût che ognidun al è stât assegnât a un autôr di dramis che al à presentât un test, che al larà in sene intune version plui curte, une sorte di trailer di uns vincj minûts. Il “Licôf”, ven a stâi la inaugurazion, e varà ancje il zovament de presince di studiôs e operadôrs leâts al mont de culture furlane tant che Gianni Cianchi, Francesca Gregoricchio, William Cisilino e Paolo Patui, che a presentaran e a scrutinaran i tescj teatrâi proponûts.
PROGRAM
Vinars ai 6 di Dicembar
– aes 19.00 | Dramaturgjie di vuê – Four di Claudio Moretti, Fabiano Fantini e Elvio Scruzzi; regjie di Serena Di Blasio
– aes 20.00 | Gnovis propuestis – Marta di Alessandro Di Pauli, Stefania Ursella e Dario Paolo D’Antoni; regjie di Paolo Nikli
– aes 21.00 | Teatri di tradizion – La Casa, il prin drame teatrâl di Siro Angeli; regjie di Carlotta Del Bianco
Sabide ai 7 di Dicembar
– aes 19.00 | Teatri pai zovins – Il diaul e la gubane, test scrit di Chiara Carminati, voltât par furlan di Priscilla De Agostini e adatât al teatri dai pipinots di Michele Polo e Patrick Platolino; la narazion e je chê di Sonia Cossettini
– alle 20.00 | Adataments teatrâi – Lis feminis di Gregoricchio, misture di tescj di Gianni Gregoricchio; regjie di Claudio Mezzelani
– alle 21.00 | Traduzions – L’ÙALI DI DIU di Miklos Hubay, voltât di Carlo Tolazzi te varietât di furlan de Val Pesarine; regjie di Massimo Somaglino
Cun Licôf, tal ultin, il Teatri Stabil Furlan al vûl ufrî al public cualchi cerce di gjenars teatrâi par furlan, cu la intenzion di nudrî par po dopo realizâ i progjets che a prometin pal miôr in plen acuardi cu lis realtâts che a si impegnin pe valorizazion dal teatri furlan.
La Associazion Teatri Stabil Furlan e met dongje: Comun di Udin, ARLeF – Agjenzie Regjonâl pe Lenghe Furlane, Societât Filologjiche Furlane, Istitût Ladin Furlan “Pre Checo Placerean”, Fondazion Teatri Gnûf “Giovanni da Udine”, CSS Teatri Stabil di Inovazion dal Friûl-Vignesie Julie e Civiche Academie di Art Dramatiche “Nico Pepe”.
Info:
Udin, Teatri Palamostre, plaçâl Paolo Diacono 21
tel +39 0432 506925 fax +39 0432 504448
biglietteria@cssudine.it
oraris: di lunis a sabide des 17.30 aes 19.30
Tes seris di spetacul la bilietarie dal teatri San Zorç, là che si ten la rapresentazion, e vierç une ore prime che a tachin i spetacui.
Jentrade: 2 euros par serade.
