Tal 2026 si celebrin i trente agns de leç regjonâl 15/1996. La prime che e à ricognossût il furlan tant che “lenghe”, di tutelâ e di promovi. Un moment storic che la ARLeF – Agjenzie regjonâl pe lenghe furlane e à volût ricuardâ e celebrâ cuntune campagne di comunicazion su cjarte stampade, radio, television e canâi social.
La aprovazion des Normis pe tutele e pe promozion de lenghe e de culture furlanis e la istituzion dal servizi pes lenghis regjonâls e minoritariis, che ducj nô o cognossìn in maniere plui semplice tant che leç regjonâl 15/1996, e à permetût di inviâ il percors che al à favorît la presince ative dal furlan tes istituzions, te vite publiche, te scuele, te culture, tai mieçs di comunicazion.
Cun cheste leç di fat a son stâts definîts i criteris par delimitâ il so teritori di aplicazion e individuâts i Comuns furlanofons; stabilide la adozion de grafie uficiâl de lenghe furlane; delineâts i prins intervents te istruzion publiche, te universitât e tal sisteme radiotelevisîf. In plui al è stât istituît un organisim di politiche linguistiche di pueste, l'”Osservatori pe lenghe e pe culture furlanis”, che dopo al è stât determinant pe nassite, tal 2005, di une agjenzie autonome: la ARLeF, l’organisim cul compit, assegnât de Regjon, di meti in vore e disvilupâ la politiche linguistiche pe lenghe furlane. Lis azions di chest ent a son tantis e une vore diferentis: dal disvilup dai imprescj linguistics ae scuele e ae formazion, dal supuart al ûs dal furlan te AP ae comunicazion e ae promozion sociâl de lenghe, de toponomastiche al disvilup di imprescj e tecnologjiis che i garantissin al furlan un puest tal mont digjitâl.
Chestis iniziativis a àn un sôl obietîf: permeti al furlan di superâ lis sfidis de contemporaneitât e restâ vitâl.
🔗 Va te pagjine di progjet par scuvierzi ducj i detais de campagne.
