Profums, liendis e tradizions de Cjargne si puedin cjatâ intun sôl plat simbul: i cjarsons. A Friuli Doc 2026, la ARLeF e à pensât di celebrâlu cuntun apontament che al met adun la cusine dal teritori, la valorizazion de lenghe furlane e il lengaç dai socials.
Sabide ai 12 di Setembar aes 11:00, a Udin te cort di Palaç Morpurgo, tal spazi di Coldiretti FVG si podarà cjapâ part al incuintri Cuale ise la vere ricete dai cjarsons? Un apontament che al promet di disvelâ la storie e i segrets di un plat tra i plui innomenâts de cusine de Cjargne e di chê furlane.
A condusi, cu la sô inconfondibile ironie, al sarà Marcutti, il Friulencer che al à milions di visualizazions.
Invezit, a fevelâ di chest plat identitari a saran doi protagoniscj speciâi: Nicolas Fonzar, cognossût pe rubriche “Mangjâ e murî” dal canâl YouTube YoupalTubo cun plui di 18.000 iscrits e cuasi un milion di visualizazions ogni an, al presentarà in anteprime assolude il gnûf video dedicât juste apont ai Cjarsons;
Germano Pontoni, innomenât Mestri di Cusine, par tant timp president de Unione Cuochi FVG e autôr di passe 20 publicazions su lis ecelencis dai prodots dal teritori furlan. Ambassadôr dal patrimoni culinari furlan tal mont – lu à rapresentât in tantis ocasions internazionâls, come tal Expo di Aichi in Gjapon e tal Expo di Milan –, Pontoni al contarà la origjin dai cjarsons cun liendis e segrets di preparazion, storiis personâls e di altris innomenâts cogos furlans che a àn fat cognossi chest plat ator pal mont.
L’incuintri si sierarà cuntune cerce golose par cure de Associazion Progetto Quattro Stagioni APS (che Pontoni al è il president) ative te promozion culturâl tal setôr gastronomic.
🧚🏽Discuvierç ancje il secont apontament de ARLeF a Friuli Doc 2026, dedicât ai plui piçui!
IL SPAZI “FURLAN DOC” IN VIE MARCJÂT VIERI
Dai 10 ai 13 di Setembar, la ARLeF e sarà ancje presinte tal spazi Furlan Doc, in vie Marcjât vieri. La vetrine de lenghe furlane a Friuli Doc, coordenade dal Comun di Udin, e metarà adun ents, associazions e editôrs par ufrî al public un panorame complet su lis novitâts, lis ativitâts e sui materiâi di promozion dal furlan.
Consulte i materiâi
| Ogjet | Cjale |
| Cjace al tesaur in biblioteche pai plui piçui |
|
