Al mancje pôc par che al torni Maman!, la trasmission che di agns e compagne i plui piçui a scuvierzi la lenghe furlane doprant il zûc, la musiche, la fantasie e il divertiment. Un sucès che al va indenant tal timp e che si rinove cuntune stagjon plene di sorpresis, che a confermin Maman! tant che l’apontament par furlan dedicât ai fruts plui ricognossibil e cu la storie plui lungje.
La date di segnâ sul calendari e je vinars ai 9 di Otubar, aes 18.30, cuant che Daria Miani cul so gjat inseparabil Vigji, e Desiree Chiappo Debegnach, la sô simpatiche “vicine di cjase”, a tornaran su Telefriuli (canâl 11) par screâ une gnove aventure. Fin in Jugn, Maman! al larà in onde ogni vinars aes 18.30, cun replichis di domenie aes 7 e aes 13.00.
Maman! al è il risultât di une coproduzion fra la ARLeF e Telefriuli.
Midiant dal zûc, de narazion e de scuvierte, ancje in cheste gnove stagjon Daria e Desiree a svicinaran i plui piçui al plurilinguisim, fasintju jentrâ in contat cul furlan in maniere naturâl e divertente, e dimostrant ai gjenitôrs i tancj vantaçs cognitîfs e comunicatîfs peâts al fat di cognossi plui lenghis za dai prins agns di vite.
I ingredients de “recipe” di Maman! no cambiin, mantignint lis rubrichis plui amadis dal public. In “Fasìn un zûc”, i fruts a podaran provâ lis lôr cognossincis cun quiz, zûcs e induvinei, invezit “La cusine Bete”, la “cusine” strambe di Daria, ur proponarà ai plui piçui di zuiâ cul inglês e cul furlan par imparâ tantis peraulis intes dôs lenghis. A zuiâ cu lis lenghis, ma cheste volte cul furlan e cul todesc, e sarà ancje la piçule Corinna che e je a stâ a Stocarde cui siei gjenitôrs, e e sarà protagoniste di cualchi cameu cun Daria.
Dopo de sô aparizion inte stagjon passade, che e à concuistât il public dai plui zovins e des mamis, e torne ancje Ketty: e sarà la protagoniste de rubriche Ce sbelet cun Ketty!, dedicade al sbelet, che e cjape dentri frutis e fruts.
E nol podeve mancjâ un altri protagonist une vore amât: “Spiçut il riçut”, il carton animât dedicât soredut ai plui piçui, che al conte lis aventuris, lis emozions e lis scuviertis di un riç une vore dolç e dai siei amîs.
Dutis lis pontadis de gnove stagjon de trasmission a saran a disposizion ancje su la tv on demand di Telefriuli come ancje sul canâl YouTube e sul sît de ARLeF, là che si puedin za viodi lis cuasi 300 pontadis des stagjons passadis. Achì a son a disposizion ancje altris contignûts simpatics su Maman!
