In ocasion de Zornade Europeane des Lenghis, la ARLeF – Agjenzie Regjonâl pe Lenghe Furlane e promôf l’incuintri dal titul Il rûl des gnovis tecnologjiis intal disvilup des lenghis minoritariis, inte suaze dal festival Vicino/Lontano.
L’apontament al è par sabide ai 26 di Setembar aes 10.30 inte Sale Ajace di Palaç d’Aronco a Udin.
L’incuintri al cjape ispirazion di une des primis ricercjis sientifichis sul rapuart tra lenghe minoritarie e tecnologjie, intitulade Can the web help save my language? (Il web puedial salvâ la mê lenghe?), e al esplore il rûl des tecnologjiis digjitâls tal tutelâ e tal pandi lis lenghis minoritariis, massime i progjets che a compagnin la difusion dal furlan inte comunicazion in rêt.
Il diretôr de ARLeF William Cisilino al moderarà l’incuintri, indulà che si confrontaran trê esperts di comunicazion, informatiche e lenghis minoritariis: Alberto Masini, consulent e formadôr che si ocupe di inovazion digjitâl pe aministrazion publiche e di informatiche al servizi des lenghis minoritariis; Luca Peresson, docent di informatiche che di passe vincj agns al coordene progjets informatics in jutori dal disvilup dal furlan, fra chescj il “Grant Dizionari Bilengâl Talian Furlan”, “Lenghis” e il “Corpus de lenghe furlane”; Fulvio Romanin, aministradôr delegât di Ensoul, une agjenzie di web development, e guest teacher al Festival of Festivals, al Istitût European di Design / IED e inte Universitât dal Friûl.
Par notâsi, lâ sul sît www.vicinolontano.it
