Dome sessante minûts par fâ un viaç che al travierse plui di mil agns di storie linguistiche. Al è ce che al promet “Dante, ce fâstu?”, no tu sâs che… Lis buinis resons par amâ la lenghe furlane”: un event in program domenie ai 15 di Jugn, aes 17, intal Salon dal Albergo Roma di Tumieç.
L’apontament – che al viodarà protagoniscj il scritôr Flavio Santi e il diretôr de ARLeF, William Cisilino – al jentre intal program di “Vie dei libri – Festival letterario transfrontaliero”, inmaneât di PordenoneLegge e dal Comun di Tumieç par promovi il dialic tra teritoris, lenghis e culturis midiant de leterature. L’incuintri al è promovût in colaborazion cu la ARLeF e al è a jentrade libare.
Santi e Cisilino a acompagnaran il public intun percors naratîf apassionant che, partint de lenghe furlane fevelade vuê, cui siei mûts di dî e lis sôs peraulis di ogni dì, al puartarà indaûr i presints fin aes sôs lidrîs. Cun esemplis, fatarei e riflessions, si fasarà une ricostruzion di cemût che lis tantis popolazions passadis pal Friûl intai secui a vedin lassât segns linguistics ancjemò vîfs, disvelant la evoluzion e la ricjece dal furlan. No sarà une lezion di linguistiche, ma pardabon un spetacul culturâl apassionant e divertent, ae puartade di ducj. L’incuintri al ufrirà clâfs di leture ancje sul avignî dal furlan e su cemût che, plui in gjenerâl, si disvilupin lis lenghis intal timp.
A ispirâ la riflession al è stât (e al sarà domenie) nuie mancul che Dante Alighieri. Propit lui, intal so De vulgari eloquentia, al cite la liende medievâl de pantere, creature mitiche buine di inmagâ cul profum che e da fûr de sô bocje. Il Sommo poeta le doprarà par une alegorie potente dal volgâr pulît: une lenghe “che e fâs sintî il so profum in ogni citât, ma che no à la sô cjase inniò”. Duncje, ogni lenghe e à il profum de poesie, ma cemût jessi sigûrs che e deventi une opare di art e di civiltât? Il furlan al ufrìs une rispueste concrete. Fuart di une storie lungje, di une produzion leterarie tra chês plui origjinâls dal panorame european e di une vitalitât ancjemò intate, cheste lenghe e dimostre cemût che lis lidrîs a puedin dâ vite a une culture identitarie fuarte. L’incuintri al sarà une ocasion preziose par tornâ a scuvierzi la bielece e la impuartance dal furlan.
