fbpx

Gnûf model di gjestion dal Sportel linguistic regjonâl pe lenghe furlane

Il Sportel linguistic regjonâl pe lenghe furlane si inricjìs di cuatri sportei periferics che si zontin al Sportel centrâl inte erogazion dai servizis di consulence linguistiche, di consulence toponomastiche, di traduzion e di promozion de lenghe furlane.

Lis sedis periferichis dal Sportel, viertis dai 4 di Fevrâr passâts, a son a Tumieç, li dal municipi, tant che riferiment par dut il Friûl de Alte; a Muçane, li de biblioteche civiche, pe Basse furlane e pe Campagne Aquileiese; a Gurize, li dal municipi, pal Friûl Orientâl; e a San Vît dal Tiliment, li de biblioteche comunâl, pal Friûl Ocidentâl. Il Sportel centrâl al à sede invezit a Udin.

Il progjet di Sportel – finanziât de Regjon F-VJ cui fonts de leç 482/1999 e rimetût ae ARLeF in cualitât di organisim competent pe sô gjestion – al centralize lis ativitâts che fin vuê a vignivin coordenadis dai singui Comuns midiant di finanziaments dedicâts. La gnove modalitât di gjestion e permet che i servizis erogâts de sede centrâl e des sedis periferichis a sedin davuelzûts in mût capilâr a pro di ducj i ents locâi, dai ents strumentâi e dai concessionaris di servizis publics includûts intes areis rispetivis dai sportei, rivant cussì a dut il teritori furlanofon. Il servizi al è garantît ancje ai privâts, se stimât coerent cu lis liniis di politiche linguistiche regjonâls.

I servizis ufierts di ogni Sportel si riferissin in particolâr ae consulence linguistiche e ae traduzion scrite dal talian al furlan di tescj, cul obietîf di garantî l’ûs tai ents stes de lenghe furlane; la consulence su la toponomastiche in lenghe furlane pai ents che a vedin dibisugne di prontâ la cartelonistiche stradâl e insegnis in gjenerâl, e par garantî il plen rispiet dai toponims uficiâi stabilîts su la fonde dal D.P.Regj. n. 16 dai 13/02/2014; la informazion e l’orientament al public.

Il Sportel centrâl, cun di plui, al ufrìs tra i tancj servizis ancje il supuart aes ativitâts di politiche linguistiche e di promozion de lenghe furlane fatis de Regjon e dai ents locâi. Al garantìs ancje la assistence inte ativitât di verifiche e di valutazion dal stât di aplicazion dal insegnament e dal ûs de lenghe furlane intes istituzions scolastichis. Al garantìs infin il servizi di interpretariât simultani in talian dai intervents fats in lenghe furlane dilunc des sentadis dal Consei regjonâl.

Cliche chi par altris informazions sui servizis e lis sedis dai Sportei.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304