ARLeF e Ente Friuli nel Mondo a puartin la lenghe furlane a Tokyo. Al è stât inviât ai 6 di Març il prin cors di lenghe furlane “a distance”, un progjet pilote pal Fogolâr Furlan gjaponês, che i doi ents a stimin di podê slargjâ in curt ancje a altris Fogolârs intal mont.
A fâ i auguris ae classe te ocasion de prime lezion, a jerin il Diretôr de ARLeF William Cisilino e il President di Ente Friuli nel Mondo, Adriano Luci, insiemi ancje cu la vicepresidente Anna Pia De Luca. Tra i arlêfs invezit, ancje il President dal Fogolâr di Tokyo, Flavio Parisi. La domande di vê un cors e je partide propit di lui e al è stât il so interès fuart a puartâ la ARLeF a ativâ cheste gnove modalitât di formazion.
Il cors – che propit parcè che al è sperimentâl, al ven inviât cuntun grup piçul – al ven fat une volte par setemane fin al mês di Jugn, cuant che si sierarà cu la prove finâl. Obietîf principâl al è formâ lis competencis scritis e in particolâr l’ûs de grafie uficiâl. In classe al è ancje cualchi gjaponês, che za al fevele la lenghe furlane. Docent al è Michele Calligaris, che al lavore li de sede centrâl dal Sportel Regjonâl pe Lenghe Furlane e al à une lungje esperience. Lis lezions a distance si fasaran in colegament video, in graciis de disponibilitât di une sale preparade di pueste li de sede de Regjon F-VJ di vie Sabbadini.
L’inviament
dal cors al è stât precedût intai dîs passâts di un incuintri tra il President
de ARLeF Eros Cisilino e Anna Pia De Luca, vicepresidente di Ente Friuli nel
Mondo, par condividi cualchi riflession su gnûfs progjets che a metaran dongje
i doi ents intai prossims mês.
