fbpx

“Tecniche di promozione linguistica e culturale friulana”

Iscrizions viertis fin ai 28 di Fevrâr dal 2020 par partecipâ al cors “Tecnichis  di promozion linguistiche e culturâl furlane” dal IRES FVG Impresa Sociale, di 240 oris, in partence di Març te sede di Udin par favorî la ocupabilitât di chei che a vuelin operâ intal setôr de promozion culturâl e linguistiche furlane.
La oportunitât formative e nas dal confront cu la ARLeF, che e à ideât e e je partner dal progjet, su la dibisugne di formâ une figure professionâl in stât di doprâ i struments linguistics, di marketing e comunicazion par valorizâ, midiant de realizazion di events culturâi, il patrimoni linguistic furlan. Une gnove figure a disposizion dai ents di riferiment dal setôr.

E je la prime volte che si realize un percors formatîf di chest gjenar: un mût gnûf par marcâ che la buine cognossince de proprie lenghe mari no je dome identitât e culture, ma e pues rapresentâ ancje ocupazion, creativitât e economie.

Il cors si insuaze intal Program Specific 64/2018 dal Por Fse Fvg 2014/2020, che al ufrìs une oportunitât concrete di inzornament e di specializazion par chei che a àn un titul di studi in ambit culturâl o artistic. Il fat che al sedi un cors che al professionalize e che al da ancje la pussibilitât pai partecipants di ativâ, ae fin, un tirocini fin a 6 mês li di un dai partner di riferiment pal setôr, a son une oportunitât otime par cjatâ une ocupazion coerente e adeguade al titul di studi che si à. Cun di plui, buine part dal cors e sarà dedicade ae acuisizion des competencis tecnichis necessariis a sensibilizâ e a promovi l’ûs de lenghe furlane sul teritori cul ûs dai struments dal marketing tradizionâl, ma ancje di chel digjitâl e web.

Al progjet a aderissin, tant che partners, i atôrs principâi e i ents pe promozion e pe tutele de lenghe furlane. Di là de ARLeF, a àn za dât disponibilitât par ospitâ in tirocini i arlêfs dal cors: CIRF Centri Interdipartimentâl pal disvilup de lenghe e de culture furlane de Universitât dal Friûl, il Teatri Stabil Furlan, Radio Onde Furlane, Calt sas e i comuns di Udin, Tavagnà, Ruvigne, Cjampfuarmit e Voleson Darzin. Cun di plui, al colaborarà ae iniziative ancje la Societât Filologjiche Furlane.

Il cors, gratuit e cofinanziât dal Fonts sociâl european intal ambit de atuazion dal POR FSE 2014/2020, si indrece aes personis disocupadis residentis o domiciliadis in F-VJ in possès di un titui di studi in ambit umanistic, culturâl e artistic listâts intal Avîs di candidature che si pues viodi ancje in linie sul sît dal IRES FVG. Cun di plui, e sarà preferenziâl la cognossince, almancul di fonde, de lenghe furlane fevelade e un interès intal ambit di riferiment dal cors.

Lis iscrizions a puedin jessi inviadis al IRES FVG di Udin.
Par informazions e iscrizions:
IRES FVG, tel. 0432 505479, info@iresfvg.org www.iresfvg.org



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304