Un calendari siôr di events, tra chei il Concierton dai 14 di Otubar, aes 21 li dal Teatri Gnûf “Giovanni da Udine”, di no pierdi.
Daspò di vê menât in Friûl vie pal Istât cussì tante biele musiche cun Suns Europe Istât, il festival european des arts performativis intes lenghis minorizadis, Suns Europe al siere l’an cuntun cartelon autunâl che al viôt, dai 6 ai 28 di Otubar, apontaments musicâi, presentazions di libris e aprofondiments linguistics.
L’event plui impuartant, il Concierton che ai 14 di Otubar, des 21, al viodarà esibîsi sul pal dal Teatri Gnûf “Giovanni da Udine” i artiscj e i grups selezionâts par cheste edizion novesime. Sul palc si alteraran Dania O. Tausen des isulis Faroe; il grup indie pop catalan Mishima; il rapper Ødei de Ipar Euskal Herria; la cjantante e trombetiste Lisa Harms di Drenthe; i Chroma, un zovin grup dal Gales; e il cjantautôr furlan Devid Strussiat.
Prime dal concierton, aes 18, il conciert “Cantata in memoria di Pier Paolo Pasolini”, event organizât in colaborazion cul Teatri Stabil Furlan.
I biliets si ju pues comprâ intal sît www.vivaticket.it e intes rivenditis autorizadis Vivaticket e alì de bilietarie dal Teatri Gnûf “Giovanni da Udine” (di martars fin ae sabide des 16 aes 19, a tacâ dai 10 di Otubar).
Sun Europe al è organizât de cooperative Informazione Friulana, editore di Radio Onde Furlane – cu la poie finanziarie dal MiC – Ministero della Cultura, de Regjon Autonome F-VJ, de ARLeF, e in colaborazion cun cetancj sogjets publics e privâts.
Il program complet dal festival si pues viodilu sul sît www.sunseurope.com
