Imni uficiâl

“Incuintri al doman” al è l’imni uficiâl dal Friûl, composizion su test di Renato Stroili Gurisatti e musiche dal mestri Valter Sivilotti.

Al è stât selezionât inte suaze di un concors inmaneât dal Istitût Ladin Furlan “Pre Checo Placerean” e dal Messaggero Veneto, cu la colaborazion de ARLeF – Agjenzie Regjonâl pe Lenghe Furlane e proclamât tant che vincidôr in ocasion de Fieste de patrie dal Friûl, che si è tignude a Voleson Darzin ai 8 di Avrîl dal 2018.

L’Imni al veve di riclamâ i caratars principâi e particolârs dal Friûl, in riferiment ae storie, aes tradizions, ae identitât sociâl e linguistiche di dute la comunitât.

Dopo valutazion atente de bande di une jurie di esperts – cun president il compositôr di nivel internazionâl Azio Corghi e componude dal prof. Marco Maria Tosolini, il prof. Alessio Screm, la professore Chiara Vidoni e il dott. William Cisilino – “Incuintri al a doman” al è stât sielt tant che imni uficiâl dal Friûl. Une composizion là che, daûr de motivazion de jurie, “la musiche e il test si integrin a vicende, traviers une scriture vocâl e strumentâl di grant respîr e di slanç di cjant potent”.

La prime esecuzion dal imni si è tignude intal Domo di Lignan, ai 6 di Otubar dal 2018.
“Incuintri al doman” al è stât eseguît de Mitteleuropa Orchestra, direzude dal mestri Marco Guidarini. La esecuzion vocâl e je stade assegnade al Coro del Friuli Venezia Giulia, direzût dal mestri Cristiano dell’Oste.
Prime dal Imni e je stade eseguide la Novesime sinfonie di Beethoven, che e conten l’“Imni ae gjonde”, o ben l’Imni de Europe Unide.

In ocasion de Fieste de Patrie dal Friûl dal 2020, la ARLeF e l’Istitût Ladin Furlan a àn pandût un video musicâl dal Imni uficiâl dal Friûl, “Incuintri al doman”. Un video di grant incjant là che, in mancul di doi minûts, la Patrie furlane si mostre in dute la sô bielece di nature, stagjons, citâts, borcs e storie, intant che lis zovinis cjantantis di ArteVoce Ensemble (Consuelo Avoledo, Michela Franceschina, Jessica Interdonato e Giulia Polidori)  a fasin rivocâ peraulis e musichis – tornadis a rangjâ pe ocasion dal musicist Geremy Seravalle – che a emozionin pardabon.

---