Lis 99 cjartis inte scjate, in plui lenghis, par fâ zuiâ i fruts cu lis fameis e i lôr educadôrs.
99 PERAULIS, publicât di Futura Edizioni e fat di Silvana Schiavi Fachin, docente e formadore esperte di didatiche plurilengâl, cu la poie de ARLeF, al è un gnûf format ludic-didatic de Golaine “99domande”. Un libri in forme di scjate, cun dentri 99 cjartis di zûc, e ancjetantis peraulis, dissegnadis dai fantats dal Centri Diurni Punto Zero cu la colaborazion de ilustradore e responsabile dal progjet “Geneticamente diverso” Patrizia Geremia.
“99 Peraulis. Fevelâ cul mont, Parlare col mondo, Talking to the world” al promôf la educazion pluriculturâl e interculturâl tant che fondament di un percors educatîf plurilengâl, e al è pensât par judâ i fruts e i fantats des nestris scuelis a cressi cence prejudizis e stereotips, ma ancje braurôs dai alts valôrs de lôr tradizion storiche e culturâl. Lis peraulis, i proverbis, lis cjançons… a son declinâts in 15 lenghis: in efiets l’obietîf didatic al è chel di puartâ i fruts de scuele de infanzie e de primarie, in maniere divertente, ae scuvierte graduâl des analogjiis e des diferencis che a esistin tra lis diviersis visions dal mont, i diviers compuartaments, lis crodincis e lis opinions dai popui de Tiere, e a ricognossi lis corispondencis o lis diferencis che a son tra i elements lessicâi doprâts des lenghis par esprimi la diversitât culturâl e di pinsîr. L’ûs didatic dal zûc al pues partî dai dissens realizâts su lis cjartis par scuvierzi ce che i fruts a cognossin za sui argoments e lis ilustrazions presentadis, lassant lôr la libertât di esprimisi intes lenghis che a cognossin miôr: par furlan o talian, ma ancje in chês altris lenghis che a fevelin in cjase (par esempli un dialet locâl o di une altre regjon, une altre lenghe dal teritori tant che il sloven o il todesc) o une des lenghis de gnove imigrazion (l’albanês, il cravuat, il rumen). In bande dai dissens colorâts, ancje i tescj, de prime cjarte fin ae 99, si fasin man a man plui complès e articolâts: des piçulis filastrocjis, proverbis, disberdeelenghe, fin aes cjançons, aes storiis e aes poesiis di grancj poetis.
Il progjet de Golaine “99 domande” al à ancje un valôr sociâl, che lu fâs ancjemò plui preziôs, e al nas de idee che in graciis de culture si pues ufrî lavôr e integrazion sociâl a personis in situazion di disavantaç o cun disabilitâts fisichis/psichichis che se di no a saressin esclududis dal mont dal lavôr. Il progjet, di fat, al è realizât dal dut dentri dai laboratoris sociâi de cooperative e lis ilustrazions a son fatis dal centri socioeducatîf Punto Zero. Cuistant i libris di Futura Edizioni si contribuìs duncje a sostignî e a alimentâ un progjet sociâl che al cumbine culture, marcjât e solidarietât.
Informazions utilis su la publicazion e il progjet:
Par sostignî e inricjî il progjet – indreçât ai fruts, aes fameis e aes bibliotechis – sedi dal pont di viste ludic che dal pont di viste de didatiche intes scuelis, la cjase editore Futura e à realizât di là de scjate/libri in formât picinin 9×7, une serie di materiâi specifics pe ativitât didatiche in classe:
– lis 99Peraulis cun schedis zigantis (27×22) pe ativitât didatiche in aule;
– un CD-ROM che al conten il libri/zûc cu lis 99 cjartis in file singui di proietâ o di doprâ cu la L.I.M., e i 99 dissens in blanc e neri di stampâ e di fâ colorâ ai fruts.
Al è stât fat cun di plui de ARLeF un videotutorial “99Peraulis: cemût si doprial?” , presint in chest sît ae sezion Video, par ufrî sponts didatichis sul ûs di chescj materiâi dentri des classis.
Futura e ufrìs ancje la pussibilitât di organizâ, cun 99Peraulis e daûr domande, laboratoris cui fruts intes scuelis o bibliotechis e laboratoris par grups di insegnants sul ûs didatic des 99 cjartis. Par informazions: www.futuracoopsociale.it
Consulte i materiâi
| Ogjet | Cjale |
| Cjale une cerce di "99Peraulis" |
|
| Cjale il videotutorial |
|
| Discjame lis schedis di colorâ |
|
Imagjins
