Dut par furlan al è un cors pratic di lenghe furlane, util par imparâle cun facilitât e soredut par scrivile daûr des regulis de gramatiche e de grafie uficiâl.
Al è indreçât sedi a cui che al fevele par furlan ma nol è bon di scrivilu, sedi a chei che lu capissin ma no lu fevelin. Ideât di Adriano Ceschia, il cors al è fat di 20 lezions, ognidune spartide in trê sezions tematichis:
- la sezion Ortografie e Gramatiche e analize lis regulis de gramatiche e de ortografie de lenghe, insegnant a scrivi in maniere corete daûr des regulis de grafie uficiâl;
- la sezion Bocons di Narative e propon leturis di autôrs furlans impuartants (cun in bande la traduzion par talian) par capî miôr la gramatiche, ancje midiant di esercitazions pratichis e cul sugjeriment di peraulis e espressions che l’ûs dal talian al à puartât a dismenteâ;
- infin, la sezion Scaiis di Poesie furlane dal 1945 incà e met dongje – pal plasê de leture e no dome par imparâ la lenghe – cetantis poesiis di poetis innomenâts dal nestri teritori (ancje chestis cu traduzion par talian in bande).
L’utent al pues discjamâ ogni lezion e ancje il so aprofondiment audio, che al jude la comprension e la leture.
Par scomençâ il cors, jentre te sezion Risorsis/Impare il furlan online o cliche achì.
