Il gnûf Cd dal Côr Polifonic di Rude dut dedicât ae vilote furlane
A 75 agns de sô nassite, il Côr Polifonic di Rude al celebre chest travuart impuartant cuntun Cd dedicât ae vilote furlane, gjenar popolâr fondamentâl pal svilup dal cjant corâl dal Friûl-Vignesie Julie. Il progjet al è la prove dal impegn dal côr inte promozion de lenghe e de culture furlanis e par chest al è stât sostignût cun passion de ARLeF, che si è ocupade de traduzion e dal adatament dai tescj antîcs e modernis dal librut, intal rispiet de grafie uficiâl e de variante locâl.
Nûfcent Furlan. Musichis su temis popolârs di un Friûl che nol è plui, chest il titul dal Cd publicât di Nota, al è un viaç inte memorie in 21 tocs, che al vûl delineâ une storie di emigrazion, amôrs, passions e vueris. La sielte de cuvierte, che in mût significatîf e mostre il famôs cuadri di Zigaina “Assemblee di bracents sul Cormôr”, e evidenzie ancjemò di plui la intenzion.
Il progjet al è stât presentât di pôc in presince dal president de ARLeF Eros Cisilino, dal assessôr regjonâl aes autonomiis locâls Pierpaolo Roberti, dal responsabil des relazions esternis de corâl Pier Paolo Gratton e dal musicolic Alessio Screm.
La opare e je disponibile in dut il Friûl.
