fbpx

“Maçalizi – il dio del massacro”

Pal spetacul “Maçalizi – Il dio del massacro” e sarà une prime assolude chê in program a Cividât, te suaze dal Mittelfest, ai 29 e ai 30 di Lui – aes 19.00 e aes 21.30 – tal Claustri di Sant Francesc (tal câs di brut timp, inte Glesie di Sant Francesc).

La comedie de dramaturghe francese Yasmina Reza “Le Dieu de carnage”, deventade famose intal 2011 cul film “Carnage” di Roman Polanski, par talian “Il dio del massacro”, pe XXXI edizion dal festival e devente “Maçalizi”, titul de version in lenghe furlane voltade di William Cisilino e Michele Calligaris.

Il spetacul – une coproduzion ARLeF – Agjenzie Regjonâl pe Lenghe Furlane, CSS Teatro stabile di innovazione FVG e Mittelfest 2022 – al conte dal confront/scuintri tra dôs fameis intun contest borghês.
In sene a saran Fabiano Fantini, Massimo Somaglino, Aida Talliente e Rita Maffei, che e je ancje regjiste adun cun Fabrizio Arcuri.

La storie e je chê di dôs cubiis che si cjatin intun tinel par cuietâ la barufe violente tra i lôr fîs. In curt, chest incuintri par fâ la pâs si trasforme intun scuintri esplosîf. La dinamiche di tension che e nas tra i personaçs si riflet inte evoluzion des peraulis. Sul imprin il talian al camufe, tant che lenghe astrate de conversazion, i sintiments plui autentics e profonts, che a vegnin fûr man a man cul furlan, che al finìs duncje par disvelâsi la lenghe dai stâts di anim e dai istints plui vêrs.

Cun chest spetacul che al savarà rindi tangjibile la potence de lenghe furlane, la ARLeF si conferme une presince impuartante dal Mittelfest.

Par informazions e biliets: info@mittelfest.org

Consulte i materiâi

Ogjet Cjale
Par savênt di plui


Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304