Tal dopomisdì di miercus ai 21 di Mai, si son davueltis lis premiazions de edizion n. 11 dal concors pes scuelis “Città Fiera premia la tua classe“.
Come ogni an, il concors al previodeve une sezion dedicade al premi speciâl de ARLeF par oparis in lenghe furlane realizadis di classis des scuelis de infanzie e primariis dal teriori furlanofon.
Pe categorie DISSEN, pe Scuele de infanzie e pes classis I e II de Scuele Primarie, cul teme “Di grant o vuei deventâ…” la jurie e à sielzût tant che vincidore la classe:
✈️II de scuele Primarie di Cjamin dal Tiliment (IC di Codroip)✈️
cun cheste motivazion:
“L’elaborât, che al cumbine il dissen cun peraulis clâf in lenghe furlane, al valorize in maniere individuâl il lavôr di ogni student, creant une piçule opare mestre coletive. Ogni dissen al vierç un barcon sui siums e sui desideris plui autentics dai fruts. Si percepìs un lavôr plui struturât di fonde, cun atenzion particolâr ae ricercje dai tiermins par furlan, che a valorizin la realizazion ludiche e creative. La jurie si complimente ancje pe presentazion dal lavôr, bon esempli di ativitât didatiche“
MENZON SPECIÂL ancje par:
sezions A e B de scuele de Infanzie “A. Taverna” di Udin (IC Udin 1).
Pe categorie dal TEME, pes classis III, IV e V de Scuele primarie, cun “Une zornade che no dismentearai mai!“, la jurie e à sielzût tant che vincidôrs i arlêfs
☀️Khushi, Marlo, Michela, Zoe de classe V A de scuele “G. Marconi” di Muimans (IC di Premariâs)☀️
cun cheste motivazion:
“L’elaborât “Pieris di intop” al risalte pal ûs curât e apropriât dal lessic te variante locâl, mostrant une buine paronance tal ûs de lenghe e te elaborazion dai contignûts. Il colegament tra la storie dal secul passât e lis dinamichis globâls di vuê, a dimostrin sensibilitât e maturitât. Il riferiment ai Fogolârs furlans, tant che esempli positîf di conservazion de identitât culturâl e dai leams a dispiet de distance, al zonte un auguri finâl inclusîf che al puarte sperance“.
MENZONS SPECIÂLS ancje par:
Giorgia Di Marco de classe V de scuele primarie “J. Tomadini” di Rualis (IC Cividât)
e par
Alessandra Manin de classe V de scuele primarie “V. Alfieri” di Torean (IC Cividât).
