La sô tesine di maturitât e tratave de valorizazion dal furlan e de furlanetât di Gurize puartade indenant dal storic Liceu Classic dal cjâf lûc dal Friûl Orientâl, tra la fin dal ‘800 e il principi dal ‘900
Rossella Dosso, di Caprive, 20 agns, ancje se e je une vore zovine, e je za une frescje scritore pluripremiade. Ai ricognossiments vûts intal passât, cumò si è zontât chel de ARLeF (Agjenzie Regjonâl pe Lenghe Furlane) che al à un significât particolâr. Di fat, la Agjenzie e à volût premiâ il lavôr di ricercje fat di Rossella te ocasion dal so diplome di maturitât classiche, otignût, intal an scolastic 2017-2018, li dal Liceu Classic “D. Alighieri” di Gurize. Un aprofondiment sul rûl che il storic Liceu Classic dal cjâf lûc dal Friûl Orientâl (in chê volte Staatsgymnasium) al à vût inte valorizazion de lenghe furlane e inte definizion de furlanetât di Gurize, tra la fin dal ‘800 e il principi dal ‘900 (in chei agns, par esempli, il Staatsgymnasium al classificave i siei students, su la fonde des lôr nazionalitâts, in: slovens, furlans, talians e todescs). Un aspiet storic, par altri, che al jere za stât aprofondît, intal passât, di bande di un antenât di Rossella.
Rossella Dosso, che cumò e je iscrite al prin an de Facoltât di Economie Aziendâl li de Universitât dal Friûl, intal 2017 e à za vinçût, inte categorie students, la prime edizion dal concors leterari di San Zorç di Noiâr “Vôs de Basse”, cuntune conte par furlan. Prime, e veve vinçût altris premis leteraris a Cormons, Scluse, Gussola (Cremone), Rodallo (Turin) e Roncadelle (Brescia).
