Di vinars ai 13 di Otubar dal 2023, e torne a tacâ la trasmission televisive par fruts in lenghe furlane “Maman!“, coprodusude di ARLeF e Telefriuli e presentade di Daria Miani.
Lis pontadis de 8e stagjon a laran in onde su Telefriuli (canâl 11 dal Digjitâl terestri) ogni vinars aes 18.30. Lis replichis a vignaran trasmetudis te domenie, aes 07.00 e aes 13.00.
La gnove serie si presente, come simpri, siore di rubrichis divertentis e stimolantis, come “La cusine Bete“, la cusine strambe e colorade di Daria, che ur spiegarà ai fruts cemût realizâ tancj lavoruts simpatics midiant di laboratoris o dant sugjeriments par risolvi piçulis situazions de vite di ogni dì. A tornin ancje Max e Leo, i protagonisç de rubriche “Zuìn cu lis lenghis”: i doi fradis, che a fevelin in maniere fluente inglês, furlan e talian, si confrontaran cun Daria zuiant e insegnant ai plui piçui tantis peraulis dal inglês.
No pues mancjâ l’apontament cu “La pueste di Maman!”, là che la condutore e je impegnade tal rispuindi aes domandis mandadis dai piçui telespetatôrs; “Leìn insiemi” al è il moment dedicât ae leture di flabis e contis; “Fasìn un zûc” al cjape dentri i fruts cun zûcs e quiz.
In ogni pontade, po dopo, no mancjaran il moment dedicât ai cartons animâts – in particolâr te seconde part de stagjon al sarà presentât un gnûf, che al fasarà divertî i plui piçui cu… la matematiche – e chel dedicât ai videofumets cun protagonist il piçul riç Ghiti e i siei tancj amîs besteutis. Par balâ e cjantâ insiemi par furlan, a saran invezit proponudis gnovis videocjançons in Sacheburache (un progjet Belka Media) come ancje chês di Vosutis te sachete (un progjet de Associazion musicâl “Bertrando di Aquileia”).
Dutis lis gnovis pontadis di Maman! a saran po dopo a disposizion su la tv on demand di Telefriuli come ancje sul canâl Youtube e sul sît de ARLeF.
