fbpx

La ARLeF a Friuli Doc 2019

La ARLeF – Agjenzie Regjonâl pe Lenghe Furlane e rinove la presince a Friuli Doc cul spazi “DOC come la tô lenghe”, dedicât ae promozion, ae informazion e ae distribuzion di materiâi par furlan. Ma la lenghe furlane chest an e jentre intal vîf de comunicazion di Friuli Doc in maniere ancjemò plui incisive par vie de colaborazion strente cul Comun di Udin. A fevelin par furlan il sît internet e i social de manifestazion midiant dal servizi di traduzion metût a disposizion de ARLeF e, pe prime volte, dôs viis impuartantis di jentrade ae manifestazion – il Borc di San Cristoful (Riva Bartolini) e chel di Puscuel – a dan il bon acet ai visitadôrs cun strissons stradâi par furlan.

Il bancut istituzionâl de ARLeF al sarà intal cûr de citât, alì dal spazi “Assaggi di Friuli Venezia Giulia” in Place San Jacum, in graciis de sinergjie creade cun PromoTurismoFVG. Chi si podaran ritirâ tancj materiâi informatîfs, vê indicazions sui servizis de Agjenzie e cognossi i tancj struments informatics metûts a disposizion de ARLeF par scrivi in maniere corete in lenghe furlane.

Doi i events speciâi de ARLeF programâts intes zornadis centrâls di Friuli Doc, simpri intal Spazi “Assaggi di Friuli Venezia Giulia”, in Place San Jacum:

Vinars ai 13 di Setembar, aes 17.00: presentazion dal libri “E alore, Frico!” di Adriano Del Fabro. Un viaç svelt tor di un dai plats simbul de cusine furlane: storie, curiositâts, contis, ricetis… A intervegnin l’autôr, William Cisilino (diretôr de ARLeF), Nicola Foschiatto (president de Latarie Sociâl Turnarie di Ravose e Magredis) e l’enolic Giorgio Bertossi dal Mulino delle Tolle. La presentazion si sierarà cuntune cerce di frico (par cure de Unione Cuochi del Friuli Venezia Giulia).

Sabide ai 14 di Setembar, aes 17.00: l’apontament cun “MasterCogo pai fruts di Maman!” al è dedicât ai fruts. Un zûc “sensoriâl” cun domandis par scuvierzi i ingredients di tantis ricetis de tradizion furlane. A condusilu e sarà Daria Miani, la amade protagoniste di Maman!, che e je la cognossude trasmission televisive in lenghe furlane par fruts realizade de ARLeF e in onde su Telefriuli, che propit cul mês di Otubar e tornarà a scomençâ la sô programazion setemanâl. Si daran fûr premis a ducj i fruts e materiâi informatîfs che a descrivin i vantaçs de educazion plurilengâl.


Concors “Lis vôs dai animâi
Ancje lis besteutis a “fevelin” par furlan. E tu, sâstu cemût?

Ancje chest an, la ARLeF e propon a ducj i partecipants di Friuli Doc un concors simpatic par metisi in prove cu la lenghe furlane. In pali 10 cassis Bluetooth (3W) che a vignaran gjavadis a sorte tra ducj chei che a rispuindaran in mnaiere corete aes 6 domandis su lis vôs dai animâi.

Cemût partecipâ:
Ritire la cartuline li dal stand de ARLeF, complilile e torne a consegnâle. I vincidôrs a saran anunciâts sul sît e sui social de ARLeF dentri dal mês di Otubar dal 2019.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304