IV CONFERENCE REGJONÂL SU LA LENGHE FURLANE

4^e CONFERENCE REGJONÂL DI VERIFICHE E DI PROPUESTE SU LA METUDE IN VORE DE LEÇ REGJONÂL 29/2007 (Normis pe tutele, valorizazion e promozion de lenghe furlane)

In atuazion dal art. 30 de L.R. 29/2007 (Normis pe tutele, valorizazion e promozion de lenghe furlane), il president dal Consei regjonâl al convoche une Conference di verifiche e di propueste su la metude in vore de leç su la tutele, valorizazion e promozion de lenghe furlane.

Par chest, e je stade costituide une cabine di regjie, cun a cjâf il President dal Consei Mauro Bordin, che e à stât daûr aes fasis di ideazion e di coordenament che a son coventadis par realizâ la Conference. La cabine di regjie e je componude di: Consei Regjonâl F-VJ, ARLeF, Assessorât regjonâl aes autonomiis locâls, Assemblee di comunitât linguistiche furlane, Universitât dal Friûl, Direzion centrâl autonomiis locâls, funzion publiche, sigurece e politichis de imigrazion e il Servizi lenghis minoritariis e coregjonâi tal forest, Direzion centrâl dal lavôr e il Servizi istruzion, Ufici scolastic regjonâl.

La Conference e je organizade de Segretarie gjenerâl dal Consei Regjonâl dal Friûl-Vignesie Julie e de ARLeF – Agjenzie regjonâl pe lenghe furlane.

Obietîfs
La Conference e à il compit di valutâ lis ativitâts di tutele e di promozion de lenghe furlane davueltis tai ultins 5 agns e di proponi azions gnovis che a sedin utilis pal so disvilup.

Te suaze de Conference, a son in program diviers intervents dulà che si presentaran risultâts e strategjiis futuris cun riferiment a chescj setôrs:

• Corpus de lenghe
• Aministrazion Publiche
• Istruzion
• Tecnologjiis
• Mass media
• Promozion sociâl

Lenghis di lavôr
Furlan – talian.  E je a disposizion la traduzion simultanie dal furlan al talian.

Cemût partecipâ
Si pues partecipâ in presince o stâ daûr dai lavôrs in direte streaming.

Pe partecipazion in presince, al è obligatori jemplâ la schede di iscrizion che si cjate chi sot. La partecipazion e je gratuite, e fin che a son puescj disponibii. Il tiermin pe iscrizion al è joibe ai 5 di Jugn dal 2025.
✅ FÂS CLIC ACHÌ PAR COMPILÂ LA SCHEDE DI ISCRIZION

Si informe che, par vie de direte streaming, e je previodude la riprese video di dute la conference.

Direte in streaming a disposizion su:
– YouTube ARLeF: audio disponibil te version in lenghe origjinâl (furlan o talian): https://www.youtube.com/live/_RrQH5s1qqU
– Consei Regjonâl: sul sît dal Consei te pagjine https://www.consiglio.regione.fvg.it

Atestât di partecipazion
Ai partecipants in presince si trasmetarà vie e-mail l’atestât di partecipazion, se domandât.

Contribûts
Ogni citadin al pues mandâ i propris contribûts scrits – che a sedin analisis o propuestis concretis –  sui temis tratâts, che a saran presentâts dai relatôrs vie pe Conference.

I contribûts si àn di inviâ dentri dai 19 di Mai dal 2025, dome par e-mail a conference@sportelfurlan.eu, scrivint a clâr ancje il propri Non / Cognon / direzion e-mail / numar di telefon / eventuâl ent di apartignince.