La ARLeF (Agjenzie Regjonâl pe Lenghe Furlane), in atuazion des normis de L.R. n. 6 dai 27 di Març dal 2015, inte suaze dal Program anuâl fat bon de Zonte regjonâl, e sosten la realizazion di manifestazions culturâls pe celebrazion de “Fieste de Patrie dal Friûl” di bande di ents locâi in colaborazion cu lis Pro Loco e altris sogjets publics e privâts, metint a disposizion un totâl di 35.000 euros.
A puedin acedi a chescj fonts ducj i ents locâi che a àn la lôr sede legâl intun dai comuns che a fasin part dai teritoris des ex provinciis di Gurize, Pordenon e Udin.
Lis ativitâts culturâls che si puedin finanziâ pe celebrazion de edizion numar 43 de “Fieste de Patrie dal Friûl” (a 943 agns de nassite dal Stât patriarcjâl) a àn di jessi finalizadis a valorizâ lis origjins, la culture e la storie di autonomie dal popul furlan e a puedin davuelzisi dai 16 di Març ai 12 di Avrîl dal 2020.
Il bant, il regolament e i modui pes domandis si puedin scjariâ de sezion Bants, garis, avîs 2020. Lis domandis a varan di rivâ, dentri dal tiermin perentori dai 18 di Fevrâr dal 2020, dome cun spedizion vie PEC ae direzion: arlef@certgov.fvg.it.
Chest an, la manifestazion principâl si fasarà tal Comun di Udin ai prossims 5 di Avrîl.
