Intai dîs passâts i gnûfs posters educatîfs de ARLeF – Agjenzie regjonâl pe lenghe furlane a son stâts dâts fûr a passe 600 classis de scuele de infanzie e a 1.250 classis de scuele primarie.
Lis scuelis de infanzie a àn vût il poster “La mê zornade“, che al jude i fruts a tignî a ments lis ativitâts di ogni dì e i moments impuartants de zornade tant che fâ di gulizion, gustâ, lavâsi i dincj e tant altri.
L'”Alfabet de lenghe furlane“, invezit, al vignarà doprât tes aulis des classis 1e e 2e de scuele primarie e al judarà i piçui a imparâ a lei e a scrivi l’alfabet e i digrams de lenghe furlane.
Chei un pôc plui grancj, infin, che a frecuentin za la 3e, 4e e 5e de scuele primarie, a podaran zovâsi dal poster “Friûl”, cuntune mape par imparâ i confins dal Friûl, trop che al è grant, lis citâts plui impuartantis e i cinc sîts dal Patrimoni mondiâl UNESCO.
In maniere simboliche, il president de ARLeF, Eros Cisilino, al à consegnât di persone i materiâi al Istitût Comprensîf di Tresesin. A jerin presints i arlêfs de prime e de cuinte de scuele primarie, adun cu lis lôr insegnantis di lenghe furlane Sonia Cargnelutti e Anna Zossi.
I posters educatîfs a son un supuart util pai docents, par insegnâ la lenghe furlane in maniere simpri plui vivarose, stiçant la curiositât e la partecipazion dai fruts. Al è propit par chest che a son stadis fatis trê versions diferentis, daûr dal cicli scolastic di riferiment.
I posters, in formât A3, si puedin discjamâ in maniere gratuite ancje achì.
Tal nestri sît, a son a disposizion ancje altris materiâi pai insegnants e pes fameis, come par esempli schedis didatichis e i files audio dal “Alfabet de lenghe furlane”, par scoltâ la pronunzie di ogni letare e des peraulis che a tachin cun chel sun. Cun di plui, si pues ancje discjamâ il pdf cu lis singulis letaris: il frut al podarà taiâlis fûr, metilis dongje e creâ gnovis peraulis, sot de vuide dal insegnant o dai gjenitôrse
Chescj posters a insiorin un progjet plui ampli, stant che za de fin dal 2022 la Agjenzie e je daûr a dâ fûr in maniere gratuite “Anìn!”, il Manuâl pal insegnament de lenghe furlane intes scuelis primariis. Chest, di fat, al è il prin manuâl pensât par compagnâ i arlêfs a scuvierzi la lenghe furlane, lis particolaritâts dal teritori dal Friûl, de sô storie e de sô culture. Al è un progjet promovût de ARLeF in atuazion dal Plan gjenerâl di politiche linguistiche pe lenghe furlane 2021-2025 de Regjon Autonome Friûl-Vignesie Julie. Al ven dât a ducj i arlêfs des scuelis primariis che i lôr gjenitôrs a àn aderît al insegnament de lenghe furlane tant che previodût de leç 482/99 e de leç regjonâl 29/2007.
Par cualsisei informazion, i docents a puedin contatâ il Sportel Regjonâl pe Lenghe Furlane a chescj riferiments: tel. 0432 1743400, e-mail scuele@sportelfurlan.eu.
