La storie de lenghe furlane e de sô leterature e rive a Pordenonelegge.
Vinars ai 18 di Setembar dal 2026, aes 15.00, inte Sale ProPordenone (Viâl Cossetti 20), al sarà presentât “Une Fevele Sflandorose. Storie aventurose de lenghe furlane e de sô leterature/Una Splendida Favella. L’avventurosa storia della lingua friulana e della sua letteratura”, il gnûf volum firmât di William Cisilino e Flavio Santi e publicât de ARLeF par scuvierzi la ricjece de marilenghe.
Un viaç a traviers dai secui che al torne a dâ dongje une storie aventurose – come che al evidenzie il sottitul – e al acompagne il letôr dilunc di doi percors complementârs: la storie linguistiche dal furlan e de sô difusion, e la storie de sô leterature, des primis testemoneancis fin ai autôrs contemporanis.
La presentazion dal volum si vierzarà cul intervent dal President de ARLeF, Eros Cisilino. Cui autôrs, e dialogarà la gjornaliste Marta Rizzi.
Tal volum a cjatin spazi ancje i dâts sociolinguistics plui resints, presentâts midiant di infografichis preziosis e semplicis e un “Struc dal struc” dedicât ae storie dal Friûl e aes ativitâts di tutele e promozion de lenghe metudis adun tai ultins agns di svariâts sogjets impegnâts in chest setôr. Dal dut bilengâl, par furlan e par talian, “Une Fevele Sflandorose/Una Splendida Favella” al met dongje une impostazion divulgative e il rigôr sientific e al è insiorât di un aparât iconografic plen di documents, mapis e testemoneancis visivis. Un libri pensât par cui che al cognòs za e al à a cûr il furlan, ma ancje par cui che al vûl svicinâsi pe prime volte ae storie di une lenghe che e je intal stes timp memorie, identitât e realtât vive, buine di fevelâ al presint e al futûr.
Par informazions, scrivi a: arlef@regione.fvg.it
I autôrs
William Cisilino. Al è diretôr de ARLeF. Al è stât vicepresident dal NPLD, la rêt europeane des lenghis minoritariis. Al è autôr di variis publicazions su la tutele juridiche des minorancis linguistichis in Italie e in Europe. Su la lenghe e la culture furlane al à publicât: Friulano lingua viva (par cure di, 2008), Sorestants e sotans (cun Gianfranco D’Aronco, 2012); in lenghe furlane: O sin dal gjat (2018), Mi capìs ben me (2019), Dizionari bastian contrari de lenghe furlane (2020), Ognun al bale cun sô agne (2025). Tal 2025 al à vinçût il Premi internazionâl “Ramon Llull”.
Flavio Santi. Al insegne inte Universitât de Insubrie di Como-Varese. Al volte autôrs classics e contemporanis. Al à scrit di vampîrs, precaris, supererois, ma soredut dal Friûl, sedi in poesie che in prose. I siei romançs, contis e poesiis a son stâts voltâts in tantis lenghis. Tra i siei romançs: Aspetta primavera, Lucky (Socrates 2011, candidât al Premi Strega); La primavera tarda ad arrivare (Mondadori 2016), L’estate non perdona (Mondadori 2017), L’autunno del sultano (Solferino 2024). Cun Quanti al à vinçût il Premi Viareggio Poesia tal 2021. Al colabore cun cuotidians, rivistis e sîts online.
La prefazion dal volum e je dal scritôr Giorgio Fontana, che al conte
“A son lis dôs animis, chê popolâr e chê leterarie, che a vegnin esploradis tal ordin cui contribûts di Cisilino e di Santi – ancjemò plui preziôs parcè che a slargjin a sorprese l’orizont dal furlan. Cisilino, par esempli, nus pant che l’autôr dal prin test par protofurlan al è stât un african, e o preseìn il sincretisim che al à dât forme e vivôr ae marilenghe tai secui – inalterade tant che lenghe regjonâl, une raritât intun Nord Italie di comuns. Santi, invezit, nus regale un sfolmenât cors intensîf di leterature furlane, de Ete di Mieç a Pierluigi Cappello, fondât su la cubie “lusôr-viamence” che si intone tant ben cun cheste lenghe scrite.”
