E je daûr a tacâ la consegne des bandieris dal Friûl ai Comuns furlans che lis àn domandadis. La iniziative promovude de Agjenzie Regjonâl pe Lenghe Furlane e à vût un acet positîf e emozionant di bande des aministrazions locâls che cussì, in ocasion dai 3 di Avrîl, zornade des celebrazions pe Fieste de Patrie dal Friûl, a podaran vistî di fieste i lôr comuns.
La ARLeF, intai mês passâts, e à cjapât contat cun ducj i comuns furlans, metintsi a lôr disposizion pe distribuzion de bandiere – ricognossude in maniere uficiâl cuntune leç regjonâl – che al mostre, suntun fondâl celest, la innomenade acuile eraldiche colôr aur cu lis alis viertis.
La machine organizative e je za in vore e in curt o scomençarìn cu la distribuzion, che e finirà in timp par podê celebrâ ducj insiemi il 3 di Avrîl, piturant di celest i lûcs simbul de Patrie.
La bandiere dal Friûl e je il setim vessil plui antîc in Europe (1334). La origjin de bandiere dal Friûl e rimonte ai timps dal principât dai Patriarcjis di Aquilee, clamât ancje Patrie dal Friûl o Stât patriarcjâl furlan, un stât sovran che dal 1077 al 1420 al guviernà il Friûl e, in moments alternis, ancje altris teritoris. L’esemplâr plui innomenât e antîc de bandiere patriarcjâl al è esponût intal Museu dal Domo di Udin.
La iniziative de ARLeF e rive un an dopo de fieste “virtuâl” dal 2020: ancje se tal rispiet de campagne di distanziament sociâl #joorestiacjase, necessarie par vie dal moment che si sin cjatâts a vivi, pardabon in tancj a àn rispuindût ae iniziative de ARLeF. Cussì, a son stadis passe 500 lis fotografiis di bandieris rivadis ae Agjenzie di ogni cjanton dal Friûl, ma ancje di bande di furlans fûr de regjon o dal forest.
