Joibe ai 21 di Novembar dal 2019, des 17.00 aes 19.00, te Aule Magne dal Liceu sientific “G. Marinelli”, in viâl Leonardo da Vinci 4 a Udin, si fasarà la presentazion dal gnûf supuart interatîf Lenghis.me, complet di lezions, provis e esercizis. Al è un strument che al ufrìs grandis potenzialitâts pe didatiche de lenghe furlane, taliane e inglese, intune prospetive plurilinguistiche.
La iniziative e je indreçade a ducj i insegnants e ai dirigjents des Scuelis primariis e secondariis di prin grât dal Friûl.
I contignûts e lis carateristichis dal strument a saran ilustrâts di Annalisa Galati e di Dario Chialchia, doi dai insegnants che a àn partecipât al progjet, cun esemplis pratics utii par capînt l’ûs.
Dentri di Lenghis.me, finanziât de ARLeF e realizât dal Claap – Centri di Linguistiche Aplicade “Agnul Pitane”, a son disponibii i sussidiaris digjitâi pal prin cicli de scuele primarie pe aree linguistiche, par chê matematiche e des siencis. Chest strument informatic al ufrìs un percors di didatiche zovevule e moderne, in stât di sostignî i insegnants cun materiâi za pronts, valorizant ancje risorsis, progjets e materiâi che a puedin inricjî il strument e dant ai docents interessâts la pussibilitât di jessi part ative intal disvilup dal progjet.
Si domande di confermâ la presince, regjistrantsi a chest leam.
