Certificazion de cognossince de lenghe furlane

Il D.P.Regj. 079/2014, in atuazion dal articul 7, come 3, de L.R. n. 29/2007 (Normis pe tutele, valorizazion e promozion de lenghe furlane), al dissipline lis modalitâts, i criteris e lis carateristichis par otignî la certificazion de cognossince de lenghe furlane. Il sisteme di certificazion al valute e al certifiche il nivel di competence intal ûs de lenghe furlane di cui che al partecipe aes provis di certificazion. Chest sisteme si articole in nivei progressîfs di competence, daûr des indicazions dal Cuadri comun european di riferiment pes lenghis (QCER), adotât cun Risoluzion dal Consei di Europe dal Novembar dal 2001.

I nivei previodûts pe certificazion de lenghe furlane a son cuatri: A – B – C1 – C2 (che a corispuindin ai nivei A2, B1, C1 e C2 dal QCER).

Daûr di ce che al è previodût de normative in vore de Regjon Autonome Friûl-Vignesie Julie, la organizazion des provis pe certificazion e je rimetude ae ARLeF – Agjenzie regjonâl pe lenghe furlane.

Cul obietîf di preparâ cualsisei che al desideri otignî la certificazion linguistiche, e je disponibile culì cualchi simulazion di prove di esam par ognidun dai nivei previodûts.

Il calendari des provis e lis modalitâts di presentazion de domande di partecipazion a son rindûts publics cuntun avîs di pueste, publicât inte sezion “Publicitât legâl” di chest sît.

Par altris detais si rimande al “Regolament des provis di certificazion de cognossince de lenghe furlane”, che si pues consultâ chi sot.

PROVE DI AUTOVALUTAZION

Par orientâsi inte sielte de prove di certificazion linguistiche plui adate pal propri nivel di competence, la Universitât dal Friûl e à realizât une prove di autovalutazion che si pues consultâ tal portâl https://aform.uniud.it

I nivei di certificazion

• Nivel A – Elementâr

  La prove e ateste la cognossince de lenghe furlane al nivel A2 dal QCER.

  Il candidât al à disvilupât lis abilitâts linguistichis che a coventin par podê tacâ a interagjî inte vite sociâl e di vore, intun contest dulà che si fevele par furlan.

  Il candidât al comuniche in ativitâts lineârs e abitudinariis che a domandin un sempliç scambi di informazions su argoments familiârs e comuns. Al è bon di descrivi cun peraulis semplicis aspiets de sô vite, dal ambient che i sta intor; al sa pandi dibisugnis imediadis.

   

  Descrizion par setôr:

  Scoltâ

  Al rive adore a capî espressions e peraulis che si doprin une vore dispès, su ce che lu tocje in maniere direte (par esempli informazions di base su la sô persone e su la sô famee, lis compris, l’ambient dongje di lui e il lavôr). Al capìs il sens essenziâl di messaçs e anunzis curts, sempliçs e clârs.

  Lei

  Al rive adore a lei tescj curts e facii e a cjatâ informazions specifichis e prevedibilis tal materiâl di ogni dì, tant che publicitât, programs, menûs e oraris. Al rive a capî letaris personâls semplicis e curtis.

  Interazion orâl

  Al rive adore a comunicâ frontant temis sempliçs e abituâi che a domandin dome un scambi facil e diret di informazions su argoments e ativitâts che al cognòs ben. Al rive adore a partecipâ a conversazions curtis.

  Produzion orâl

  Al rive adore a doprâ une serie di espressions e frasis par descrivi cun peraulis semplicis la sô famee e altris personis, lis sôs cundizions di vite, la cariere scolastiche, il lavôr e v.i.

  Scrivi

  Al rive adore a cjapâ notis semplicis e a scrivi messaçs curts su argoments che a tocjin bisugns imediâts. Al sa scrivi une letare personâl une vore semplice, par esempli par dî graciis a cualchidun.

• Nivel B – Intermedi

  La prove e ateste la cognossince de lenghe furlane al nivel B1 dal QCER.

  Il candidât al à disvilupât lis abilitâts linguistichis che a coventin par frontâ situazions che si puedin previodi inte vite sociâl e di vore, intun contest dulà che si fevele par furlan.

  Il candidât al capìs i aspiets fondamentâi di argoments familiârs che a tocjin la scuele, il timp libar, e v.i. Al è bon di produsi un test sempliç leât a argoments familiârs o di interès personâl. Al è bon di descrivi esperiencis e avigniments, siums, sperancis e ambizions, e ancje di spiegâ in curt lis sôs opinions e i siei progjets.

   

  Descrizion par setôr:

  Scoltâ

  Al rive adore a capî i elements principâi di un discors clâr in lenghe standard su argoments familiârs che al fronte dispès sul lavôr, a scuele, tal timp libar, e v.i. Al capìs i elements essenziâi di tantis trasmissions radiofonichis e televisivis su argoments di atualitât o cuistions che i interessin a nivel personâl o professionâl, baste che il discors al sedi clâr e no masse svelt.

  Lei

  Al rive adore a capî tescj scrits di ûs corint peâts al ambit cuotidian o al lavôr. Al capìs la descrizion di avigniments, di sintiments e di desideris in letaris personâls.

  Interazion orâl

  Al rive adore a frontâ la plui part des situazions che si puedin presentâ intun contest dulà che si fevele par furlan. Al rive a partecipâ, cence vê preparât nuie prin, a conversazions su argoments familiârs, di interès personâl o che a tocjin la cuotidianitât (par esempli la famee, i passetimps, il lavôr, i viaçs, e i fats di atualitât).

  Produzion orâl

  Al rive adore a descrivi, colegant espressions semplicis, esperiencis e avigniments, i siei siums, lis sôs sperancis e lis sôs ambizions. Al sa motivâ e spiegâ in curt opinions e progjets. Al rive a contâ une storie e la trame di un libri o di un cine e a descrivi lis sôs impressions.

  Scrivi

  Al rive adore a scrivi tescj sempliçs e coerents su argoments che al cognòs o che i interessin. Al rive a scrivi letaris personâls fevelant di esperiencis e di impressions.

• Nivel C1 – Avanzât

  La prove e ateste la cognossince de lenghe furlane al nivel C1 dal QCER.

  Il candidât al à disvilupât abilitâts linguistichis che i permetin di lavorâ intun contest dulà che si fevele par furlan e frecuentâ cors di studi, ancje di nivel universitari e/o post universitari. Al è in stât di interagjî ancje in situazions no familiârs o cuant che si domande di doprâ un lengaç plui specific.

  Il candidât al capìs une grande varietât di tescj complès e luncs e al è bon di ricognossi il lôr significât implicit. Si esprim in maniere spontanie e naturâl. Al dopre la lenghe in maniere flessibile e produtive par fins sociâi e professionâi. Al rive adore a disvilupâ tescj clârs, ben articolâts, e detaiâts su argoments complès, mostrant un control salt de struture testuâl, dai conetôrs e dai elements di coesion.

   

  Descrizion par setôr:
  

  Scoltâ

  Al rive adore a capî un discors lunc ancje se nol è struturât in maniere clare e lis relazions no vegnin segnaladis, ma sotintindudis. Al capìs cence fâ masse fature lis trasmissions par television e i films.

  Lei

  Al rive adore a capî tescj leteraris e informatîfs luncs e complès e a ricognossi lis diferencis di stîl. Al rive adore a capî articui specialistics e istruzions tecnichis avonde lungjis, ancje cuant che no fasin part dal so setôr.
  

  Interazion orâl
  

  Al rive adore a esprimisi in maniere facile e spontanie cence vê bisugne di cirî masse lis peraulis. Al dopre la lenghe in maniere flessibile e produtive intes relazions sociâls e professionâls. Al rive adore a formulâ ideis e opinions in maniere precise e a colegâ cun abilitât i siei intervents cun chei di chei altris locutôrs.

  Produzion orâl
  

  Al rive adore a presentâ descrizions claris e articoladis su argoments complès, zontant temis secondaris, disvilupant aspiets specifics e concludint dut in maniere oportune.
  

  Scrivi

  Al rive adore a scrivi tescj clârs e ben struturâts disvilupant in maniere analitiche il so pont di viste. Al rive adore a scrivi letaris, saçs e relazions presentant argoments complès, marcant chei che par lui a son i aspiets plui impuartants. Al rive adore a sielzi il stîl adat ai letôrs destinataris dai siei scrits.
  

• Nivel C2 – Paronance in situazions complessis

  La prove e ateste la cognossince de lenghe furlane al nivel C2 dal QCER.

  Il candidât al à disvilupât lis abilitâts linguistichis che a coventin par podê jentrâ in maniere facile in cualsisedi contest dulà che si fevele par furlan.

  Il candidât al capìs cun facilitât dut ce che al scolte o che al lei. Al è bon di fâ il struc di informazions che a rivin di fonts diferentis, sedi orâls che scritis, tornant a struturâ i argoments cuntune presentazion coerente. Al è bon di esprimisi in maniere spontanie, une vore fluide e precise, individuant lis sfumaduris di significât ancje minimis in situazions complessis.

   

  Descrizion par setôr:
  

  Scoltâ

  Nol à nissune dificoltât tal capî cualsisedi variante, fevelade dal vîf o trasmetude, ancje cuant che al è un marilenghe che al fevele svelt, baste che al vedi il timp par usâsi ae sô pronunzie.

  Lei

  Al rive adore a capî cence fature dutis lis formis di lenghe scrite, ancje tescj teorics complès a nivel struturâl o linguistic, tant che manuâi, articui specialistics e oparis leterariis.

  Interazion orâl

  Al rive adore a partecipâ cence fâ nissun sfuarç a cualsisedi conversazion e discussion, e al cognòs lis espressions idiomatichis e colocuiâls. Al sa esprimisi cun facilitât e trasmeti cun precision sfumaduris di significât minimis.

  Produzion orâl

  Al rive adore a presentâ descrizions o argomentazions claris e naturâls, cuntun stîl adat al contest e cuntune struture logjiche eficace che e puedi judâ cui che lu scolte a identificâ i elements plui impuartants di tignî a ments.

  Scrivi

  Al rive adore a scrivi tescj clârs, che si disvilupin cun naturalece e fluiditât e cuntun stîl adat. Al sa scrivi letaris, relazions e articui complès, presentant i contignûts cuntune struture logjiche che e jude il destinatari a individuâ i elements plui impuartants di tignî a ments. Al rive adore a scrivi strucs e recensions di oparis leterariis e di tescj specialistics.

Ativitât realizade di

in colaborazion cun

---