Il prin manuâl par insegnâ la lenghe e la culture furlane te scuele primarie
Al è stât presentât, ae presince de Assessore Alessia Rosolen, “Anìn!“, il prin manuâl par insegnâ la lenghe e la culture furlane te scuele primarie.
Il progjet, promovût de ARLeF in colaborazion cu la Regjon Autonome Friûl-Vignesie Julie, in atuazion dal Plan gjenerâl di politiche linguistiche pe lenghe furlane 2021-2025, al è un passaç fondamentâl, sedi pal insegnament dal furlan che pal avignî de lenghe.
I volums dal manuâl a son in distribuzion propit in chescj dîs in ducj i ples scolastics dulà che si insegne la lenghe furlane (tant che previodût de L. 482/99 e de L.R. 29/2007) e a vignaran dâts fûr a ducj i arlêfs des scuelis primariis che a cjapin part aes lezions di furlan par compagnâju a scuvierzi la lenghe, il teritori dal Friûl, la sô storie e la sô culture.
Il manuâl si compon di doi volums: Anìn 1 – Impare e zuie cun Ane la Agane e Sandri il Sbilf, pensât pe didatiche des classis I e II e Anìn 2 – In viaç ator pal Friûl, dedicât aes classis III, IV e V.
Cul prin volum, i arlêfs a saran bogns di cjapâ sù lis primis competencis te leture e i prins elements di gramatiche de lenghe furlane.
Cul secont volum, i students a aprofondiran lis particolaritâts storichis e gjeografichis dal Friûl, cjapant sù, man a man, simpri plui competencis comunicativis de lenghe furlane.
I manuâi di “Anìn!” a sono par cure de professore Rosalba Perini, che e à lavorât cuntun grup di esperts e docents, coordenâts di Edizioni Didattiche Gulliver.
I sussidiaris si caraterizin pe presince di elements didatics particolârs, tant che liniis dal timp e mapis cognossitivis, esercizis graduâi e box cun glossaris, il dut insuazât intune dimension plurilengâl.
Il curicul di/in lenghe furlane si inserìs duncje tal percors didatic tradizionâl de scuele primarie, dant ai arlêfs gnûfs struments e prospetivis di cognossince.
Va te pagjine dal Progjet par scuvierzi ducj i detais di “Anìn!”
