Pe Setemane de Culture Furlane 2024, inmaneade de Societât Filologjiche Furlane, la ARLeF e propon doi apontaments pai plui piçui.
Sabide ai 11 di Mai a son in program zûcs e laboratoris cu la lenghe furlane, in doi Comuns.
“1, 2, 3, 4, 5… Numaruts cun Maman!” al è il secont apontament de zornade, organizât cu la colaborazion de Aministrazion comunâl di Reane dal Roiâl. Si fasarà intal dopomisdì, aes 17.00, li de Biblioteche civiche di Reane (vie Battaglione Julio 7, a Remugnan).
Un laboratori ludic e didatic cun Daria Miani, la condutore de trasmission televisive par fruts “Maman!”, dulà che i fruts a podaran cognossi i personaçs dal carton animât de ARLeF “I Numaruts”: modonuts ducj colorâts e une vore simpatics a judin a imparâ la matematiche cun cjants, zûcs e divertiment. A saran ancje proietâts i episodis dal carton, che al va in onde propit su Maman! (su Telefriuli, ducj i vinars aes 18:30 e in repliche la domenie aes 7 e aes 13).
Prime di lâ vie, ducj i partecipants a varan un simpatic regâl tant che ricuart dal dopomisdì di divertiment cu la lenghe furlane.
Par partecipâ si à di notâsi dentri di miercus ai 8 di Mai, contatant il Sportel regjonâl pe lenghe furlane: 04321743400 o info@sportelfurlan.eu
Viôt cuâl che al è il prin apontament de ARLeF pe Setemane de Culture Furlane.
