Ai 21 di Fevrâr si celebre la Zornade Internazionâl de Lenghe Mari, istituide de UNESCO tal 1999 par promovi la diversitât linguistiche e culturâl e il multilinguisim.
Cheste date e je stade sielte par ricuardâ un fat grâf sucedût ai 21 di Fevrâr dal 1952, cuant che 4 students bengalês de Universitât di Dacca (e altris che si zontarin intai dîs seguitîfs), a son stâts copâts par man de polizie di chel che alore al jere il Pakistan orientâl, intant che a rivendicavin la uficialitât de lôr lenghe, il bengali.
In dì di vuê, la diversitât linguistiche e je simpri plui menaçade man a man che lis lenghis a murin. A nivel globâl, il 40% de popolazion no à acès ae istruzion intune lenghe che e fevele o che e capìs.
Par fortune, però, si stan fasint progrès inte istruzion multilengâl, cuntune cussience cressinte de impuartance de lenghe mari (soredut inte scuele de infanzie) e al è un impegn plui fuart pal so disvilup te vite publiche des personis.
