La ARLeF e proclame i vincidôrs dal concors “La mê peraule dal cûr par furlan e je…” pe Zornade Internazionâl de Lenghe Mari.
Nol è stât par nuie facil sielzi! O vês partecipât pardabon in tancj e ducj cun peraulis dal cûr bielononis!
Sêso curiôs di savê cui che al à vinçût? Ve chi cualchi indizi: a son grancj…e piçui. A vegnin di ogni bande dal Friûl (e no dome). Ognidun di lôr al à une peraule dal cûr par furlan dal dut speciâl…
Veju ca, alore, cuntun agrât a ducj chei che, cu la lôr partecipazion, nus àn judât a celebrâ in maniere origjinâl chest 21 di Fevrâr, Zornade internazionâl de Lenghe Mari.
Ai 21 di Fevrâr si celebre la Zornade Internazionâl de Lenghe Mari, istituide de UNESCO tal 1999 par promovi la diversitât linguistiche e culturâl e il multilinguisim.
Cheste date e je stade sielte par ricuardâ un fat grâf sucedût ai 21 di Fevrâr dal 1952, cuant che 4 students bengalês de Universitât di Dacca (e altris che si zontarin intai dîs seguitîfs), a son stâts copâts par man de polizie di chel che alore al jere il Pakistan orientâl, intant che a rivendicavin la uficialitât de lôr lenghe, il bengali.
Cjalait il video par scuvierzi cui che a son i vincidôrs: https://bit.ly/3s8TuZd#IMLD2021
