Pai 30 agns di Friuli Doc, la ARLeF è à in program apontaments par grancj e piçui cuntun element in comun: la lenghe furlane e la sô valorizazion.
In program un incuintri su la storie de lenghe furlane e pai plui piçui un laboratori par imparâ a dissegnâ i fumuts.
Cun di plui, i fantats di YoupalTubo a presentin in esclusive un gnûf video sul frico.
Dopo dal apontament cui Gnognosaurs, firmât ARLeF al larà indenant domenie ai 15 di Setembar, aes 11.30, te cort di Palaç Morpurgo, dulà che la Agjenzie e presentarà “Una splendida favella – L’avventurosa storia della lingua friulana e della sua letteratura”: sessante minûts par contâ plui di mil agns di storie de lenghe furlane graciis ai intervents di Flavio Santi (docent de Universitât de Insubria) e William Cisilino (diretôr de ARLeF).
Santi e Cisilino a tocjaran, cun finece e ironie, i fats che a àn puartât ae nassite dal furlan e al so afermâsi tant che lenghe. Une performance a dôs vôs che e piturarà, ancje midiant di une conte par imagjins, un ritrat inedit de lenghe furlane, tant che struc des culturis che tai secui a son passadis pal Friûl.
Ae fin dal incuintri si fasarà une degustazion di vins furlans, in graciis de colaborazion cu la Coldiretti Fvj, che e darà acet al event de ARLeF inte suaze dal so calendari siôr di events. Tra chescj ancje chel che al vierç il program, joibe ai 12, realizât propit in colaborazion cu la Agjenzie.
Viôt ca sot ancje chei altris apontaments de ARLeF a Friuli Doc!
Consulte i materiâi
| Ogjet | Cjale |
| Laboratori di dissen cui Gnognosaurs e Dree Venier |
|
| Frico a sbreghebalon! |
|
