Ai 4 di Avrîl dal 1997 (juste dopo dai 3 di Avrîl, zornade dulà che si ricuarde la costituzion dal Stât patriarcjâl furlan, tal 1077) il prin astronaute di divignince furlane te storie al partì par une mission spaziâl sul Space Shuttle Columbia, puartant daûr la bandiere dal Friûl. Propit a lui, Gregory Thomas Linteris, la youtuber Desiree Chiappo e à dedicât un gnûf video di YoupalTubo: il canâl YouTube cun passe 12.500 iscrits promovût de ARLeF – Agjenzie regjonâl pe lenghe furlane, là che i protagoniscj a son une clape di zovins furlans impegnâts a contâ lis lôr passions, metint adun videos su curiositâts dal Friûl.
Il video al è stât mostrât in maniere uficiâl vie pe presentazion dal program pes celebrazions de 47e edizion de Fieste de Patrie dal Friûl, là che al è intervignût, cuntun videomessaç, il stes astronaute, che vuê al è inzegnîr mecanic al NITS – National Institute of Standards and Technology.
Greg al è nassût tal New Jersey di doi emigrâts furlans: Luigi Linteris, di San Zuan di Cjasarse, e Elena Maria Alfenore, di Prodolon di San Vît dal Tiliment. Propit dai gjenitôrs, soredut dal pari, Greg al à ereditât il leam cu la sô tiere di divignince. La sô e je une storie fate di sucès: une lauree a Princeton, un master a Stanford, un dotorât in inzegnarie mecaniche e aerospaziâl, e plui tart il spazi. Dopo cetantis selezions e un adestrament grivi, Linteris al è partît pe sô prime mission sientifiche sul Shuttle, la STS-83, puartant indenant esperiments peâts al fenomen de combustion in microgravitât, ae mecaniche dai fluits e ae sience dai materiâi.
Propit par cheste ocasion si è puartât daûr la bandiere dal Friûl: ogni astronaute di fat al pues sielzi cualchi ogjet personâl di vê cun se intant des missions e lui, in maniere significative, al à volût la bandiere dal Friûl, par ricuardâi la sô tiere e i valôrs di comunitât che i son stâts trasmetûts.
Il standart cu la acuile eraldiche che lu à acompagnât tal Shuttle i jere stât consegnât di une cubie di parincj dal pari, emigrâts in Canadà e une vore atîfs inte Famee Furlane di Toronto: Sara Alfenore e il so om, Mario Fava. Simpri lôr, dopo che al è tornât su la Tiere, i àn fat fieste inte capitâl dal Ontario propit cuntune cerimonie speciâl de Famee, adun cun altris furlans.
Consulte i materiâi
| Ogjet | Cjale |
| Cjale il video "La bandiere furlane tal spazi" |
|
