“Tropis lenghis puedie permetisi une democrazie?” al è chest l’argoment centrâl dal incuintri che la ARLeF e à promovût inte suaze dal festival vicino/lontano, une manifestazion culturâl li che la Agjenzie e colabore di passe dîs agns, par clamâ la atenzion prin di dut sul furlan, ma ancje sul teme plui larc dal plurilinguisim.
A intervignaran Giuseppe Corongiu, scritôr, ativist e studiôs impegnât te tutele e te promozion de lenghe sarde; Carles Duarte i Montserrat, poete e linguist, autôr di une “Gramatiche storiche dal catalan”; Flavio Santi, scritôr, poete e docent te Universitât de Insubrie di Como-Varese e Eros Cisilino, president de ARLeF. La gjornaliste Marta Rizzi e sarà la moderadore.
L’apontament al è in program par sabide ai 9 di Mai, aes 11.30, li de Tor di Sante Marie (vie Zanon, 24): si disviluparan riflessions che a derivin des esperiencis dal catalan, dal furlan e dal sart. Cul contribût dai esperts, si analizaran il status di chestis lenghis, lis politichis di promozion e cemût che a vegnin dopradis. Si marcarà il fat che intun contest european li che pocjis lenghis a cjapin la plui part de sene publiche, tantis altris a restin confinadis intune dimension pardabon limitade. Propit di cheste considerazion e ven fûr la domande: puedie esisti une democrazie cence pluralitât linguistiche?
Tal dibatit si fevelarà di esperiencis e visions, criticitâts ancjemò atuâls – de margjinalizazion intai contescj uficiâi ae trasmission intergjenerazionâl – ma ancje des oportunitâts che lis gnovis formis di planificazion linguistiche e lis tecnologjiis digjitâls a puedin ufrî. In chest senari, la democrazie linguistiche e vignarà fûr no dome tant che principi di tutele des diversitâts, ma tant che cundizion essenziâl par une partecipazion plene e inclusive te vite publiche europeane.
Giuseppe Corongiu scritôr, ativist e studiôs impegnât te promozion e te tutele de lenghe sarde. Al à scrit romançs, ma ancje saçs e articui che a frontin cuistions di politiche linguistiche e identitât culturâl.
Carles Duarte i Montserrat poete e linguist, al è l’autôr di une “Gramatiche storiche dal catalan” e di une “Sintesi di storie de lenghe catalane”. Ex segretari gjenerâl de Presidence de Catalogne, al è a cjâf de Fondazion CIC di Barcelone.
Flavio Santi al insegne inte Universitât de Insubrie di Como-Varese. Al volte autôrs classics e contemporanis. Al à scrit di vampîrs, precaris, supererois, ma soredut dal Friûl, sedi in poesie che in prose. Tal 2024 al à publicât pe Solferino “L’autunno del sultano”.
Eros Cisilino president de ARLeF, al è stât conseîr de Provincie di Udin e aministradôr comunâl. Autôr e coordenadôr editoriâl di diviersis publicazions, si è simpri ocupât des tematichis peadis ae tutele e ae valorizazion de lenghe furlane.
