La cjantante si esibirà pe prime volte in lenghe furlane
La ARLeF e Mittelfest a puartin in Regjon un spetacul di nivel artistic alt, un viaç inte cjançon furlane dal ultin secul, cuntune ospite di gale: Tosca, vôs straordenarie e sensibile, che e cjantarà pe prime volte in lenghe furlane.
Timp e Tiare – Cent agns des miôr cjançons furlanis al è il conciert in program il prin di Setembar dal 2021 aes 21.30, li dal Teatri Ristori di Cividât. Dongje di Tosca, sul palc si daran la volte lis cjantantis di ArteVoce Ensemble, preparadis di Franca Drioli, che i è stade dade ancje la direzion artistiche dal event. La direzion musicâl de serade e sarà di Valter Sivilotti, che al à ancje curât i rangjaments dai tocs.
Il spetacul al è une coproduzion Mittelfest, ARLeF e Accademia Musicale Naonis, in colaborazion cul Conservatori “J. Tomadini” di Udin, ArteVoce Voice&Stage Academy e cu la poie de Regjon Autonome Friûl-Vignesie Julie e Fondazione Friuli.
Par plui informazions, consultâ il sît dal festival www.mittelfest.org. I biliets a son disponibii su www.vivaticket.com.
