Al à cjatât une vore di interès il cors “Tecnichis di promozion linguistiche e culturâl furlane” organizât de IRES FVG Impresa Sociale e nassût dal confront cu la ARLeF, ideadore e ancje partner dal progjet.
Finide la fase di selezion dai candidâts, il cors si à inviât in chestis zornadis in modalitât in linie, ma di Setembar lis lezions a saran tignudis in aule, par un totâl di 240 oris. Il cors – che si inserìs intal ambit dal Program Specific 64/2018 dal Por Fse Fvg 2014/2020 – al formarà une figure professionâl in stât di doprâ i struments linguistics, di marketing e di comunicazion par valorizâ, midiant de realizazion di events culturâi, il patrimoni linguistic furlan. Ae fin dal percors al è previodût il tirocini li di un sogjet di riferiment pal setôr.
Une grande part des lezions e je dedicade ae acuisizion des competencis tecnichis di promozion de lenghe furlane doprant struments dal marketing tradizionâl, digjitâl e web. In bande de teorie, i arlêfs a varan mût di confrontâsi ancje cu la realtât, a saran presentadis di fat tantis case history di events e progjets di comunicazion za metûts in vore de Agjenzie par dâ plene atuazion ae politiche linguistiche.
I corsiscj selezionâts a son 13 arlêfs e arlevis, cun titui di studi in diviersis dissiplinis e une vore motivâts a tacâ un gnûf percors professionâl par jentrâ e lavorâ intal ambit de valorizazion e de promozion de lenghe furlane.
Al progjet – coordenât dal Fonts sociâl european intal ambit de atuazion dal POR – a aderissin, in cualitât di partners, i sogjets principâi e altris ents pe promozion e pe tutele de lenghe furlane. Di là de ARLeF, a àn dât za disponibilitât par ospitâ in tirocini i arlêfs dal cors il Cirf (Centri Interdipartimentâl pal disvilup de lenghe e de culture furlane de Universitât di Udin), il Teatri Stabil Furlan, Radio Onde Furlane, Calt sas e i Comuns di Udin, Tavagnà, Ruvigne, Cjampfuarmit e Voleson Darzin. Cun di plui, e colaborarà ae iniziative ancje la Societât Filologjiche Furlane.
