fbpx

Suns Europe 2021

Presentât il program de setime edizion dal Festival, ae presince dal president de ARLeF, Eros Cisilino e dal assessôr regjonâl ae autonomiis locâls, Pierpaolo Roberti

Suns Europe – festival des arts in lenghe minoritarie, al torne intune version estive, dai 20 di Lui al 1n di Avost dal 2021, cun apontaments musicâi, leteraris e cinematografics in nûf Comuns dal Friûl.

A son in program cutuardis events (3 di cine, 2 di leterature e 9 di musiche) cun disenûf ospits che a rivin di Paîs Basc, Isulis Føroyar, Galizie, Cjanton dai Grisons, Ladinie anauniche, Ocitanie, Sardegne, in plui che dal Friûl.

Suns Europe al è inmaneât de cooperative Informazione Friulana, editore di Radio Onde Furlane, cul finanziament principâl de ARLeF, de Regjon Autonome Friûl-Vignesie Julie, dal Comun di Udin, de Fondazion Friuli e cu la colaborazion dal Istitût Basc Etxepare e di cetancj sogjets publics e privâts, locâi e internazionâi.

Ancje intal 2021, il cartelon dal festival al è cetant siôr, e par dôs setemanis il Friûl al sarà ancjemò une volte pont di incuintri e di confront tra i popui e puartebandiere dai valôrs dal plurilinguisim, dant acet a zovins di tantis bandis de Europe, che nus fasaran cognossi la lôr identitât, culturâl e linguistiche, traviers dai lengaçs modernis e emozionants. La mission di Suns Europe, duncje e reste simpri chê: promovi lis produzions artistichis contemporaniis intes lenghis minorizadis de Europe.


Il program tal detai:

(CINE)_ martars ai 20 di Lui, aes 21.30 (in colaborazion cun CEC) inte Arene dal parc Loris Fortuna, intal Zardin Grant, Udin
Proiezion di Pozzis Samarcanda di Stefano Giacomuzzi (Friûl)

(MUSICHE)_ miercus ai 21 di Lui, aes 21.00, Cjase Candussi Pasiani, place Garibaldi, a Romans dal Lusinç, (dentri tal câs che al sedi brut timp)
Conciert cun Caamaño& Ameixeiras (Galizie)

(MUSICHE)_ joibe ai 22 di Lui, aes 21.00, (in colaborazion cun Fieste dal Emigrant), Aree de fieste di Lusevare
Conciert dopli cun Caamaño& Ameixeiras (Galizie) e Felix Lalù (Ladinie anauniche)

(MUSICHE)_ vinars ai 23 di Lui, aes 21.00, (in colaborazion cu la associazion Amîs da Mont Quarine), Cantine produtôrs Cormons, vie Vino della Pace 31, Cormons (dentri tal câs che al sedi brut timp)
Conciert dopli cun Ezpalak (Paîs Basc) e Orko Trio cun Fabian Riz (Friûl)

(MUSICHE)_ sabide ai 24 di Lui, aes 21.00, in place Venerio a Udin (ancje se al è brut timp)
Suns Friûl. Conciert cun Cristian Mauro, Trabeat, Vididule Project, Nicole Coceancig e Ezpalak (Paîs Basc)

(MUSICHE)_ domenie ai 25 di Lui, aes 21.00, Cuel di S. Martin a Dartigne (tal câs che al sedi brut timp intal Teatri Lavaroni in place Marnico 20)
Conciert dopli cun Drumlanduo (Friûl) e Dania O. Tausen (Isulis Føroyar)

(MUSICHE)_ lunis ai 26 di Lui, aes 21.00, Cort Casa della Musica di Puçui,
Conciert cun Dania O. Tausen (Isulis Føroyar).

(LETERATURE)_ martars ai 27 di Lui, aes 18.00, Librarie “Tarantola”, vie Vittorio Veneto 20, a Udin
Dibatiment leterari cun Cira Crespo (Paîs Basc). Baginen. Lis feminis che a àn fat sù il Paîs Basc

(LETERATURE)_ martars ai 27 di Lui, aes 21.00, Place dal Comun, a Murùs (tal câs che al sedi brut timp, intal Auditorium “Riedo Puppo”)
Dibatiment leterari cun Angelo Floramo (Friûl) e Andrea Giraudo (Ocitanie) «Ieu … que plor e vau cantan». Trobadors, i mestris ocitans di Dante

(CINE)_ miercus ai 28 di Lui, aes 20.00, Visionario di vie Asquini, a Udin
Proiezion di Bogre di Fredo Valla (Ocitanie)

(CINE)_ joibe ai 29 di Lui, aes 20.30, Visionario di vie Asquini, a Udin
Proiezion di Ane (Paîs Basc). Prime vision intal Stât talian

(MUSICHE)_ vinars ai 30 di Lui, aes 21.00, Cort di vie Canonica 25, a Lavarian (tal câs che al sedi brut timp intal Auditorium, place S. Paolino)
Conciert dopli cun Land of Maybe (Isulis Føroyar) e Daniela Pes (Sardegne)

(MUSICHE)_ sabide ai 31 di Lui, aes 21.00, prât dal Cjistiel di Udin (tal câs che al sedi brut timp intal Teatri Gnûf “Giovanni da Udine”)
Suns Europe. Conciert cun Brût&Madone (Friûl), Daniela Pes (Sardegne), Land of Maybe (Isulis Føroyar), Liher (Paîs Basc) e Ursina (Cjanton dai Grisons)

(MUSICHE)_ Domenie 1n di Avost, aes 22.45, Mont dai Pins a Feagne, inte suaze dal Festival Art Tal Ort di Feagne
Conciert dai Liher (Paîs Basc)



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304