Inmaneât de cooperative Informazione Friulana cu la poie finanziarie de Regjon autonome Friûl-Vignesie Julie e de ARLeF – Agjenzie Regjonâl pe Lenghe Furlane, e cul jutori dal Comun di Udin e dal Etxepare Euskal Institutua (Paîs Basc), Suns Europe al torne, te sô seste edizion, cuntun program siôr e cuntune schirie di novitâts, proponint cuasi un mês di events caraterizâts de buine musiche, dal cine e de leterature in lenghis minorizadis.
Dai 22 di Avost ai 19 di Setembar dal 2020, tantis realtâts si alternaran sul teritori, che a proponaran formulis gnovis e stimolantis, tal rispiet des normis par limitâ la difusion dal Covid-19. Il festival des arts in lenghe minorizade de Europe al proponarà lûcs sugjestîfs e plens di significâts simbolics, tant che il Cjistiel di Udin, la place dal Tei a Murùs e il cuel di S. Martin a Dartigne.
Prime novitât dal festival al è Suns Friûl, vetrine dedicade aes gnovis produzions musicâls furlanis dal moment. L’apontament al è par sabide ai 22 di Avost in place Venerio a Udin, indulà che, des nûf di sere (21.00) si alternaran artiscj de sene musicâl furlane. La jentrade e je sore nuie ma si à di prenotâ sul sît https://www.sunseurope.com/fur/prenotazion/.
Se la competizion di Suns Europe e je stade rimandade al 2021, il “conciert finâl” – cussì al è cognossût al public – al proponarà istès musiche di cualitât une vore alte. Domenie ai 30 di Avost, li dal Cjistiel di Udin, des nûf di sere (21.00) si esibiran Martina Iori Quartet (Ladinie), lis Adwaith (Gales), La Basu (Paîs Basc), Laura Giavon e Drumlando (Friûl), e Bujumannu & Jumbo from Train To Roots (Sardegne). La jentrade e je sore nuie ma cun prenotazion obligatorie sul sît: https://www.sunseurope.com/it/prenotazione.
Suns Europe al larà indevant pal rest dal mês di Avost e di Setembar, cuntun calendari plen di apontaments, che si pues consultâ sul sît www.sunseurope.com e su la pagjine Facebook https://www.facebook.com/SunsEuropeFestival.
