E je za vierte la prevendite dai biliets par la cuinte edizion dal festival,
che si davuelzarà dai 28 ai 30 di Novembar.
Suns Europe al è daûr a tornâ: il festival des arts tes lenghis minoritariis de Europe, lûc di confront e incuintri des miôrs produzions artistichis in lenghe minoritarie su scjale europeane, si davuelzarà ancje chest an a Udin di joibe ai 28 a sabide ai 30 di Novembar, tal Teatri Gnûf “Giovanni da Udine”. In cheste cuinte edizion, il festival si colore di musiche rock, punk, hard rock e psichedeliche, di ritmis pop&soul, krautrock, cumbia, dub e rap, ma ancje di une cumbinazion dal dut gnove di jazz e musiche classiche. I artiscj a vegnin de Sardegne, dal Paîs Basc, dal Gales, dal Cjanton dai Grisons, des isulis Faer Oer, de Galizie, de Ocitanie francese, dai Paîs Catalans, de Basse Sassonie e, clâr, dal Friûl.
I biliets a son za a disposizion te bilietarie dal Teatri Gnûf, intes rivenditis autorizadis e in rêt su vivaticket.it
Za de metât di Novembar Suns Europe al puartarà ator pal Friûl la musiche dai vincidôrs e dai protagoniscj des edizions passadis dal festival, che a sunaran insiemi cui artiscj furlans protagoniscj de sene musicâl di chest an.
Il grant finâl, come di tradizion, al sarà sabide ai 30 di Novembar des 21 indenant, cul concierton finâl che al maravearà il public intune sere fate di musiche, di culturis e di artiscj, a dimostrazion de bielece dal plurilinguisim e de modernitât des lenghis minoritariis europeanis.
Ancje chest an, in graciis de ARLeF, te buinore di sabide si davuelzarà Scuele Europe, la lezion-conciert pai students de scuelis secondariis di secont grât dal teritori furlan, une ocasion uniche par fevelâ de educazion plurilengâl e de citadinance multiculturâl, acompagnade de musiche dal vîf dai artiscj finaliscj di Suns Europe.
Dongje de poie de ARLeF, de Regjon Autonome F-VJ e de Fondazione Friuli, il Festival al gjolt dal jutori e dal patrocini dal Consei de Europe, di NPLD – Network to Promote Linguistic Diversity, la Rêt pe Promozion de Diversitât Linguistiche in Europe, e di tancj sogjets publics e privâts, furlans e internazionâi.
Par dutis lis informazions sul festival, al baste lâ su la sô pagjine Facebook: @SunsEuropeFestival
