Bant ARLeF pai Ents locâi dai 24 di Setembar
Il gnûf bant de ARLeF, finanziât ancje dal Assessorât regjonâl aes infrastruturis e teritori, al met a disposizion 750 mil Euros par comprâ e par instalâ la segnaletiche verticâl bilengâl talian-furlan su la fonde des normis pe tutele de lenghe furlane.
I beneficiaris dai contribûts a son i ents locâi che a operin tal teritori di lenghe furlane, daûr di ce che al specifiche l’articul 5 de leç regjonâl 15/96.
Cun chescj contribûts, lis Aministrazions a podaran sostituî i cartei stradâi monolengâi cun chei bilengâi, daûr di ce che e previôt la leç regjonâl o sostituî i cartei bilengâi che no son conformis al Codiç de Strade.
Il modul di domande di contribût, si podarà presentâlu des 10.00 dai 24 di Setembar fin aes 10.00 dai 25 di Otubar dal 2021, dome cuntune PEC ae direzion arlef@certgov.fvg.it.
